கடந்த இரண்டு ஆண்டுகளாக கொரோனா பெருந்தொற்றால் நம் துன்புற்ற பிறகும், உலக சுகாதார நிறுவனம் வழங்கியுள்ள தகவல்களின் படி, ஆண்டுதோறும் இதய நோய்கள் காரணமாக சுமார் 1.7 கோடி பேர் உலகம் முழுவதும் உயிரிழந்து வருகின்றனர். கொரோனா பெருந்தொற்றுக்குப் பிறகு, உலகம் முழுவதும் இதய நோயால் பாதிக்கப்படுவர்களின் எண்ணிக்கை அதிகரித்துள்ளது. இது மட்டுமின்றி, இளைஞர்களிடையே இதய நோய் ஏற்படும் விதிதம் அதிகரித்திருப்பதும், பல உயிர்கள் இதனால் இழக்கப்பட்டிருப்பதும் குறிப்பிடத்தக்கது. எனவே இதனைப் புரிந்துகொள்ள மும்பையின் கோகிலாபென் திருபாய் அம்பானி மருத்துவமனையின் இதயயியல் இயக்குநர் மருத்துவர் ஜம்ஷத் தலால் பல்வேறு தகவல்களை வழங்கியுள்ளார்.
தனிநபர் பழக்க வழக்கங்களில் மாற்றம் கொண்டு வருவதன் மூலமாக பல்வேறு இதய நோய்களைத் தவிர்க்க முடியும் என உலக சுகாதார நிறுவனம் பரிந்துரைத்திருந்தாலும், அதனை முடிந்த வரை சீக்கிரமாக கண்டறிவது பாதுகாப்பானது. மேலும், முடிந்த வரை விரைவில் நோய் குறித்து தெரியும் போது, அதனை வெகுவாக சிகிச்சை அளிக்க முடியும். இதுகுறித்து பேசியுள்ள மருத்துவர் ஜம்ஷத், இதய செயலிழப்புக்கும், மாரடைப்புக்கும் இடையிலான வித்தியாசம் குறித்து தெரிவித்துள்ளார். `இதயம் செயலிழப்பதும், மாரடைப்பும் ஒன்றல்ல.. இதயம் செயலிழப்பது என்பது உடலின் தேவைக்கு ஏற்ற ரத்தத்தை சரியாக இதயத்தால் அனுப்ப முடியாத நிலை ஆகும்’ எனக் கூறியுள்ளார்.
தொடர்ந்து அவர், `இதயத்தின் தசைகள் விறைப்படைவதும் அதில் இருந்து மாறாமல் இருப்பதும் இதயம் செயலிழக்கும் மற்றொரு வகை’ எனக் கூறியுள்ளார். அதே போல மாரடைப்பு குறித்து பேசிய அவர், இதயத்திற்குச் செல்லும் ரத்தத்தில் அடைப்பு ஏற்படும் போது மாரடைப்பு நிகழ்வதாகக் கூறியுள்ளார். மேலும், இதயம் செயலிழப்பது தொடர்பாக பொதுவில் பரவும் பொய் தகவல்களின் உண்மைத் தன்மை குறித்தும் பேசியுள்ளார் மருத்துவர் ஜம்ஷத் தலால். வயதானவர்களுக்கு மட்டுமே இதய செயலிழப்பு ஏற்படும் என்னும் நம்பிக்கை தவறானது எனக் கூறியுள்ளார். `சுமார் 55 வயதைக் கடந்தவர்களுக்கு இதய செயலிழப்பு ஏற்படுவது இயல்பு என்ற போதும், சமீப காலங்களில் இளைஞர்களிடையே இது அதிகரித்து வருகிறது’ என மருத்துவர் ஜம்ஷத் தலால் கூறியுள்ளார்.
இதயம் செயலிழப்பு என்பது திடீரென எந்த எச்சரிக்கை அறிகுறிகளும் இல்லாமல் ஏற்படும் எனவும் பலர் நம்பி வருகின்றனர். இதுகுறித்து பேசிய மருத்துவர், மாரடைப்பு ஏற்படும் போது நிகழும் சில அறிகுறிகள், குறிப்பாக மூச்சு விடுவதில் சிரமம், கால்களில் வீக்கம், வயிற்று உப்புசம், உடல் சோர்வு, பசியின்மை முதலானவை ஏற்படுகின்றன. இதய செயலிழப்பு ஏற்படுவதை சிகிச்சை எடுத்துக் கொள்வது குறித்து பேசிய மருத்துவர் ஜம்ஷத் தலால், `இதய செயலிழப்பு என்பது ஒருவரின் வாழ்க்கையின் முடிவல்ல. மேலும், அதை சிகிச்சை மூலம் சரி செய்ய முடியும்’ எனக் கூறியுள்ளார். இதய செயலிழப்பின் இறுதிகட்டத்தின் போது இதய மாற்று அறுவை சிகிச்சை மட்டுமே ஒரே ஆப்ஷனாக இருந்தாலும், சமீபத்திய மருந்துகளின் மூலமாக இதய செயலிழப்பை சரி செய்யவும், உயிர் வாழ்தலை மேலும் அதிகரிக்கவும் முடியும் எனக் கூறப்பட்டுள்ளது. வாழ்க்கை முறையில் மாற்றங்கள் செய்வதும், ஆரோக்கியமான வாழ்க்கையைப் பின்பற்றுவதும் மட்டுமே இவற்றில் இருந்து உடலைப் பாதுகாக்கும் சாவி எனவும் மருத்துவர் ஜம்ஷத் தலால் கூறியுள்ளார்.