இளைஞர்களின் இதயத்துடிப்பிற்கேற்ற பாடல்களை துள்ளலாக கொடுத்து வருபவர் லிட்டில் மேஸ்ட்ரோ யுவன் ஷங்கர் ராஜா. 90களில் இசையமைப்பாளராக தொடங்கிய இவரது இசை பயணம் நாளுக்கு நாள் புதுப்பித்து கொண்டே இருக்கிறது என்றால் அது மிகையல்ல.
யுவன் எனும் இசையரசன்:
கடந்த ஆண்டு மட்டும் அரை டஜன் படங்கள் இவரின் இசையமைப்பில் வெளியாகின என்பது குறிப்பிடத்தக்கது. ஏராளமான இசை பிரியர்களை கொண்ட யுவன் ஷங்கர் ராஜா தற்போது கஸ்டடி, ஆண்டவர், இறைவன், ஏழு கடல் ஏழு மலை, இறைவன் மிகப்பெரியவன், மிஸ்டர் ஜூ கீப்பர், பொம்மை உள்ளிட்ட திரைப்படங்களுக்கு இசையமைத்து வருகிறார். சென்ற ஆண்டை போலவே இந்த ஆண்டும் யுவன் ஷங்கர் ராஜாவின் இசையில் மக்கள் மெய்மறக்க உள்ளனர்.
YSR பிலிம்ஸ் தயாரிப்பு :
ஒரு இசையமைப்பாளராக யுவன் ஷங்கர் ராஜா எந்த அளவிற்கு வெற்றிபெற்றுள்ளாரோ அதே போல தனது YSR பிலிம்ஸ் நிறுவனத்தின் சார்பில் வெற்றிகரமாக படங்களையும் தயாரித்து வருகிறார். அப்படி அவரின் தயாரிப்பு நிறுவனத்தின் கீழ் வெளியான சூப்பர் ஹிட் படம் தான் ஹரிஷ் கல்யாண் நடித்த 'பியார் பிரேமா காதல்’ மற்றும் விஜய் சேதுபதி நடிப்பில் சர்வதேச அங்கீகாரம் பெற்ற 'மாமனிதன்' திரைப்படம்.
மீண்டும் இணையும் வெற்றி கூட்டணி :
அந்த வகையில் மீண்டும் YSR பிலிம்ஸ் நிறுவனத்தின் சார்பில் யுவன் ஷங்கர் ராஜா இயக்குனர் அமீரின் அமீர் பிலிம் கார்பரேஷன் நிறுவனத்தோடு இணைந்து புதிய திரைப்படம் ஒன்றை உருவாக்க திட்டமிட்டுள்ளனர். இந்த அறிவிப்பை தனது ட்விட்டர் பக்கம் மூலம் வெளியிட்டுள்ளார் யுவன் ஷங்கர் ராஜா. மேலும் இப்படத்தில் லீட் ரோலில் நடிக்க உள்ளார் அமீர் என்ற அதிகாரபூர்வமான தகவலையும் வெளியிட்டுள்ளனர். இப்படத்தின் டைட்டில், தொழில்நுட்ப கலைஞர்கள் போன்ற மற்ற தகவல்கள் விரைவில் வெளியாகும் எனவும் தெரிவித்துள்ளனர்.
ரசிகர்கள் மகிழ்ச்சி:
இந்த அறிவிப்பு யுவன் ஷங்கர் ராஜா மற்றும் இயக்குனர் அமீர் ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. அமீர் - யுவன் கூட்டணி என்றுமே ஒரு வெற்றி கூட்டணியாக அமைந்துள்ளது என்பதற்கு உதாரணமாக ராம், மௌனம் பேசியதே, ஆதிபகவன், யோகி என ஏராளமான திரைப்படங்கள் வெளியாகியுள்ளன என்பது குறிப்பிடத்தக்கது.