விஜய் டிவியில் ஒளிபரப்பாகி வரும் பாண்டியன் ஸ்டோர்ஸ் சீரியலுக்கு ஏகப்பட்ட ரசிகர்கள் இருக்கின்றனர். அண்ணன் - தம்பி பாசம், குடும்ப உறவுகள் ஆகியவற்றை சுற்றி நடக்கும் வழக்கமான இந்த கதையில் ஸ்வாரஸ்யமான திருப்பங்களும், புதிய காட்சியமைப்புகளும் பலரையும் கவர்ந்துள்ளன. இந்த சீரியலில் கண்ணனாக நடித்து வருபவர்தான் சரவணன். அன்மையில் பாண்டியன் ஸ்டோர்ஸ் கதைப்படி பாண்டியனின் மனைவி லட்சுமி அம்மாள் இறந்துவிட்டார். இதனை தொடர்ந்து மொத்த பாண்டியன் ஸ்டோர்ஸ் குடும்பமே அழும்படியான காட்சிகள் வெளியாகியிருந்தன. இந்த காட்சிகளில்தான் கண்ணன் கேரக்டரில் நடித்த சரவணன் தம்முடைய அபார நடிப்பை வெளிப்படுத்தியதாக ரசிகர்கள் பலரும் அவரை பாராட்டி வந்தனர். அவர் அழுது புரண்டு, தன் துக்கத்தை வெளிப்படுத்தியது மிகவும் ஒரிஜினலாக இருந்ததாக ரசிகர்கள் பலரும் குறிப்பிடுகின்றனர்.



மேலும் இதில் தமது தாயார் கேரக்டர் இறந்ததாக காட்சிகள் வந்திருப்பதால் கண்ணன் கேரக்டரில் நடித்துவரும் சரவணன், கதைக்காக மொட்டை அடித்துள்ளார். நடிகர்கள் பலரும் எளிதில் செய்யத் துணியாத இந்த காரியத்தை செய்ததற்காக பலரும் நடிகர் சரவணன், நடிப்பில் அர்ப்பணிப்பு மிக்கவர் என கூறி பாராட்டி வருகின்றனர். ஒரு குடும்ப திரைக்கதையின் கதாபாத்திரங்கள் எந்த அளவுக்கு எமோஷனலாக உயிர் கொடுத்து நடிக்க வேண்டுமோ, அவ்வாறு இந்த சீரியலின் அனைத்து நடிகர்களும் காட்சிகளுக்கு உயிர் கொடுத்து நடிப்பதாகவும், இவர்களின் அர்ப்பணிப்பு மிக்க நடிப்புதான் இந்த சீரியலின் ஆணித்தனம் என்றும் ரசிகர்கள் இந்த சமீபத்திய காட்சிகளைப் பார்த்துவிட்டு தொடர்ச்சியாக கூறி வருகின்றனர்.


இதில் கண்ணன் எனும் கேரக்டரில் நடித்து வரும் சரவணனுக்கு மனைவியாக பாண்டியன் ஸ்டோர்ஸ் தொடரில் ஐஸ்வர்யா கேரக்டரில் நடித்து வந்த விஜே தீபிகா தற்போது அந்த சீரியலில் இருந்து வெளியேறி இருக்கிறார். முகப்பருக்களுக்கான சிகிச்சைக்கு சீரியல் நிர்வாகம் டைம் கொடுத்தும், என்னால் அதை சரிசெய்ய முடியவில்லை. அதனால் விலகினேன் என்று சொல்லி இருந்தார். இந்த நிலையில் சமீபத்திய இந்த காட்சிகளில், அவர் சரவணனின் நடிப்பைப் பார்த்துவிட்டு, அதாவது கண்ணன் கேரக்டரின் சமீபத்திய காட்சிகளைப் பார்த்துவிட்டு புகழாரம் சூட்டி பாராட்டியிருக்கிறார்.



இதுகுறித்து விஜே தீபிகா தன் பதிவில், “டேய் நண்பா… நிஜமாவே வேற லெவல் பண்ணி இருக்க... நீ என் ஃபிரண்டுடா... இதெல்லாம் ஆக்டிங்தான்... இது எல்லாமே எனக்கு புரிகிறது. இருந்தாலும் இந்த ஒரு சீனை பார்க்கும்போது ரொம்பவே எமோஷனலா இருக்கு. வேற லெவல் பண்ணிட்ட போ... முக்கியமா உன்னுடைய ஆக்டிங் செம, ஃபயரா இருந்தது” என சரவணன் குறித்து பாராட்டிப் புகழ்ந்து விஜே தீபிகா தம்முடைய பதிவினை பகிர்ந்திருக்கிறார். இந்த பதிவை பகிர்ந்துள்ள சரவணன், தம் பக்கத்தில் பகிர்ந்து நன்றி தெரிவித்திருக்கிறார்.‌ இந்த சீரியலில், விஜே தீபிகா நடித்து வந்த ஐஸ்வர்யா எனும் கேரக்டரில், அவருக்கு பதிலாக தற்போது சாய் காயத்ரி நடித்து வருகிறார். பலவிதமான எதிர்பாராத திருப்பங்களுடனும், விறுவிறுப்புடனும் பாண்டியன் ஸ்டோர்ஸ் தற்போது ஒளிபரப்பாகி கொண்டிருக்கிறது.