விஜய் ஆண்டனி இயக்கம், நடிப்பு, இசையில் வெளியான பிச்சைக்காரன் 2 படம் நல்ல வரவேற்பைப் பெற்றுள்ள நிலையில் இப்படத்தின் வெற்றி விழா விழா நாளை கொண்டாடப்பட உள்ளது.
நடிகர் விஜய் ஆண்டனி நடிப்பில் கடந்த மே 19ஆம் தேதி வெளியான திரைப்படம் பிச்சைக்காரன் 2. கடந்த 2016ஆம் ஆண்டு சசி இயக்கத்தில், விஜய் ஆண்டனி நடிப்பில் வெளியான பிச்சைக்காரன் திரைப்படம் மிகப்பெரும் வெற்றி பெற்ற நிலையில், அதன் தொடர்ச்சியாக பிச்சைக்காரன் 2 சென்ற வாரம் வெளியானது.
முன்னதாக அம்மா சென்டிமென்ட்டை மையமாக வைத்து வெளியான பிச்சைக்காரன் படம் நல்ல வரவேற்பைப் பெற்ற நிலையில், பிச்சைக்காரன் 2 படம் தங்கை செண்டிமெண்ட், மூளை மாற்று அறுவை சிகிச்சை என செண்டிமெண்ட், ஆக்ஷன், த்ரில்லர் கலந்து வெளியானது. மேலும், தெலுங்கிலும் பிச்சகாடு 2 என்ற பெயரில் இப்படம் வெளியாகியுள்ளது.
இந்நிலையில் பெரும் எதிர்பார்ப்புகளுக்கு மத்தியில் வெளியான இப்படம் தமிழ், தெலுங்கு இரு மொழிகளிலும் நல்ல வரவேற்பைப் பெற்று வசூலைக் குவித்து வருகிறது.ம்மேலும் ஒரே வாரத்தில் இப்படம் 26 கோடிகளும் மேல் தமிழ், தெலுங்கு மொழிகளில் வசூலித்து சாதனை படைத்துள்ளது.
சுமார் 20 கோடிகள் செலவில் எடுக்கப்பட்ட இந்தப் படம் முதல் நாளே 6 கோடிகள் வரை வசூலித்த நிலையில், தமிழைக் காட்டிலும் தெலுங்கு ரசிகர்களை வெகுவாகக் கவர்ந்து வரவேற்பைப் பெற்று வருவதாகத் தகவல்கள் வெளியாகி வருகின்றன.
இந்நிலையில் பிச்சைக்காரன் 2 படத்தின் வெற்றி விழா நாளை (மே.27) விசாகப்பட்டினத்தில் நடக்கவிருப்பதாகத் தகவல் வெளியாகியுள்ளது.
பிச்சைக்காரன் 2 திரைப்படம் பல்வேறு சர்ச்சைகளைக் கடந்து திரையரங்குகளில் வெளியானது. முன்னதாக இப்படம் தன் ஆய்வுக்கூடம் படத்தி்ன் கதை, இதற்காக விஜய் ஆண்டனி 10 லட்ச ரூபாய் இழப்பீடு வழங்க வேண்டும் என ராஜகணபதி என்பவர் வழக்கு தொடர்ந்திருந்தார்.
இந்நிலையில், தன் படம் வெளியாவதைத் தடுப்பதற்காக உள் நோக்கத்துடன் இந்த வழக்கு தொடரப்பட்டுள்ளதாகவும், பொருளாதார ரீதியாக இழப்பையும் உளைச்சலையும் தான் சந்தித்து வருவதாகவும் விஜய் ஆண்டனி ஏற்கெனவே தெரிவித்திருந்தார்.
அதேபோல் மலேசியாவின் லங்காவி தீவில் இப்படத்தின் படப்பிடிப்பு நடைபெற்றபோது விஜய் ஆண்டனி விபத்தில் சிக்கி, மூக்கு, தாடை எலும்பு பகுதிகளில் பலத்த காயம் ஏற்பட்டு, அவருக்கு அறுவை சிகிச்சை மேற்கொள்ளப்பட்டது. அதனைத் தொடர்ந்து சுமார் ஒரு மாத கால ஓய்வுக்குப் பிறகு மீண்டும் அவர் குணமடைந்து படப்பிடிப்புக்குத் திரும்பினார்.
இந்நிலையில், இப்படி பல பிரச்னைகளைக் கடந்து வெளியாகியுள்ள பிச்சைக்காரன் 2 திரைப்படம், கலவையான விமர்சனங்களைக் கடந்து மக்கள் மத்தியில் வரவேற்பு பெற்று திரையரங்குகளில் ஓடி வருகிறது.