வட சென்னை படத்தின் 2 ஆம் பாகம் இப்போதைக்கு இல்லை என வெளியாகியுள்ள தகவல் ரசிகர்களிடையே சோகத்தை ஏற்படுத்தியுள்ளது.
கடந்த 2018 ஆம் ஆண்டு வெற்றிமாறன் இயக்கத்தில் வெளியான திரைப்படம் “வடசென்னை”. பொல்லாதவன், ஆடுகளம் படத்திற்கு பிறகு இந்த படத்தில் மூன்றாவது முறையாக நடிகர் தனுஷ் - வெற்றிமாறன் கூட்டணி இணைந்தது. மேலும் இந்த படத்தில் ஐஸ்வர்யா ராஜேஷ், ஆண்ட்ரியா, சமுத்திரக்கனி, அமீர், டேனியல் பாலாஜி, கிஷோர், பவன் உள்ளிட்ட பலரும் நடித்திருந்தனர். சந்தோஷ் நாராயணன் இசையமைத்த இப்படம் மிகப்பெரிய வரவேற்பையும், சர்ச்சைகளையும் சந்தித்தது.
இந்த படத்தின் 2 ஆம் பாகம் வெளியாகும் என தெரிவிக்கப்பட்ட நிலையில், 4 ஆண்டுகளை கடந்தும் படத்தின் ஷூட்டிங் நடக்கவேயில்லை. இதனால் வெற்றிமாறன் செல்லும் இடமெல்லாம் வடசென்னை -2 குறித்த கேள்வி எழுப்பப்பட்டு வருகிறது. அதேசமயம் 4வது முறையாக நடிகர் தனுஷ் - வெற்றிமாறன் கூட்டணி “அசுரன்” படத்தில் இணைந்தது. மிகப்பெரிய அளவில் இப்படம் வெற்றி பெற்ற நிலையில், இத்திரைப்படத்திற்கு சிறந்த தமிழ் திரைப்படத்திற்கான தேசிய விருதும் கிடைத்தது. சிறந்த நடிகருக்கான விருதை தனுஷ் பெற்றார்.
இதன் பின்னர் இருவரும் தங்களது பட வேலைகளில் பிஸியாக இருந்தனர். எனை நோக்கி பாயும் தோட்டா, பட்டாஸ், கர்ணன், ஜகமே தந்திரம், அட்ராங்கி ரே, மாறன், தி க்ரே மேன், திருச்சிற்றம்பலம், நானே வருவேன், வாத்தி உள்ளிட்ட 10 படங்களில் நடித்து முடித்து விட்டார். வெற்றிமாறனும் கடந்த 4 ஆண்டுகளாக “விடுதலை” படத்தை 2 பாகங்களாக எடுத்து வந்தார். இதற்கிடையில் சூர்யா நடிக்க வெற்றிமாறன் இயக்கும் “வாடிவாசல்” பட அறிவிப்பும் வெளியானது.
இந்நிலையில் விடுதலை படத்தின் முதல் பாகம் கடந்த மார்ச் 31 ஆம் தேதி வெளியானது. இப்படம் ரசிகர்களிடையே மிகப்பெரிய அளவில் பெரும் வரவேற்பை பெற்றது. இதனையடுத்து அடுத்ததாக வெற்றிமாறன் “வட சென்னை” படத்தை தான் கையில் எடுப்பார் என பலரும் நினைத்தனர். ஆனால் விடுதலை படத்தின் 2 ஆம் பாகம், வாடிவாசல் படத்தை முடித்தப் பிறகு தான் வடசென்னை படத்தை கையில் எடுக்கப் போகிறேன் என ருத்ரன் படத்தின் ஆடியோ மற்றும் டிரைலர் வெளியீட்டு விழாவில் பேசிய வெற்றிமாறன் கூறியுள்ளார்.
இந்த திட்டம் கைவிடப்படவில்லை என்றும், கண்டிப்பாக வடசென்னை 2 படம் வெளியாகும் எனவும் வெற்றிமாறன் கூறியுள்ளார். இதேபோல் ஒளிப்பதிவாளர் வேல்ராஜூம் வெற்றிமாறன் அடுத்ததாக வாடிவாசல் படத்தை தான் எடுக்கப்போகிறார் என நேர்காணல் ஒன்றில் தெரிவித்திருந்தது குறிப்பிடத்தக்கது.