செஃப் வெங்கடேஷ் பட்- இவரை தெரியாதவர் இருக்க முடியாது. விஜய் டிவியில் ஒளிப்பரப்பான இவரின் சமையல் நிகழ்ச்சி பெரும் வரவேற்பை பெற்றது. அடுத்து, விஜய்-டிவியின் பிரபல ஷோ குக் வித் கோமாளி நிகழ்ச்சியின் நடுவர். இவரது இதயம் தொட்ட சமையல் யூடியூப் சேனலும் மிகவும் பிரலமானதுதான். பாரம்பரிய உணவுகள், மேற்கத்திய நாடுகளின் உணவு வகைகள், சாட் உணவுகள் என எதுவாக இருந்தாலும் இவர் தனக்கென தனிபாணியில் ஒரு ரெசிபை பின்பற்றுவார். வெங்கடேஷ் சமையல் செய்யும் விடீயோவைப் பார்த்தாலே நமக்கும் சமைக்கனும்னு தோணும் அளவிற்கு அவர் சமையல் கலையில் வித்தகர். விடீயோக்களில் அவர் பேசிக்கொண்டு சமைப்பதைப் பார்த்து ரசிக்க தனி ரசிகர்கள் இருக்கிறார்கள் எனலாம்.
காலை உணவு ஒரு மனிதனுக்கு அவ்வளவு முக்கியம். காலை உணவிப் முக்கியத்துவம் பற்றியும் என்னெல்லாம் ஃபாலோ பண்ணனும் என்பது பற்றியும் செஃப் வெங்கடேஷ் பட் ஒரு நேர்காணலில் பகிர்ந்து கொண்டது பற்றி இத்தொகுப்பில் காணலாம்.
நம்முடைய உணவு முறை, வாழ்க்கை சூழல் ரொம்பவே மாறிவிட்டது. அதற்கேற்றவாறு நாம் ஆரோக்கியமான உணவு முறையை தேர்ந்தெடுக்க வேண்டும். பொங்கல்- ஒரு நல்ல காலை உணவுதான். அரிசியில் இருக்கும் கார்போஹைட்ரேட், பாசி பருப்பில் இருக்கும் புரோட்டீன், நெய்யில் உள்ள கொழுப்பு என எல்லாம் ஒரு ஊட்டச்சத்து காம்போதான். ஆனால், இதையே தினமும் சாப்பிட்டு வந்தா என்னாகும் தெரியுமா? ஒரு 40 நாட்கள் இதை காலை உணவாக எடுத்துக்கொண்டால் அவ்வளவுதான். 5 கிலோ எடை அதிகரிக்கும்.
தென்னிந்திய உணவுமுறையில் இட்லி ரொம்பவே பிரபலம். உலக அளவில் பிரபலம். ஆனாலும் அதன் ஆரோக்கியம் அதை நாம் சாப்பிடும் முறையிலே இருக்கிறது. இட்லி ஆவியில் வேகவைத்த உணவு என்பதால் உடலுக்கு எவ்வித கெடுதலையும் உண்டாக்காது. ஆனால், இரண்டு இட்லிக்கு ஒரு கப் சாம்பாருக்கு பதிலாக, ஆறு கப் சாம்பார் சாப்பிட்டோமானால் அவ்வளவுதான். நெஞ்செரிச்சல் உள்ளிட்ட வயிறு கோளாறுகள் ஏற்படும்.
உலகில் நம் நாட்டைப் போலவே மற்ற நாடுகளிலும் ஹெல்தி காலை உணவு இருக்கும். சீனாவின் காலை உணவும் சிறப்பானதுதான். காலை உணவாக அவங்க வேகவைத்த மீன் சாப்பிடுவாங்க. அதில் அதிக அளவு புரோட்டீன் இருக்கும்.
மேற்கத்திய நாடுகளில், காலை உணவாக ஒரு கப் பழங்கள், ஜூஸ் அப்பறம் பிளாக் காஃபி. இவ்வளவுதான். இதுவும் ரொம்பவே ஆரோக்கியமான உணவுதான். ஆவியில் வேக வைத்த உணவுகள் உடலுக்கு நல்லது. ஆனால் அதை நாம் எந்த அளவுக்கு எப்படி உண்ணுகிறோம் என்பதிலும் அடங்கியிருக்கிறது. அளவோடு சாப்பிட்டால் எந்த உடலுக்கு எந்த தொல்லையும் இல்லை.
இன்றைய அவசர உலகில் பிளாஸ்டிக் கப்பில் இட்லி தயாரிக்கப்படுகிறது, பிளாஸ்டிக் பயன்பாடு அதிகரித்து விட்டது! உணவு தயாரிப்பு துறையில் இந்த பிளாஸ்டி பயன்பாடு குறித்து என்ன நினைக்கிறீங்கன்னு கேட்ட கேள்விக்கு, வெங்கடேஷ் பட் “ இது தவறான நடைமுறை. நாம் உணவு வழங்க வாழை இலை, மந்தாரை இலைகளை மட்டுமே பயன்படுத்தி வந்திருக்கிறோம். அதனால் உடலுக்கு எவ்வித தீங்கும் ஏற்படாது. ஆனால், இன்றைய காலத்தில் பிளாஸ்டிக் கவரில் அடைத்துதான் உணவு டெலிவரி செய்யப்படுகிறது. சூடான உணவை பிளாஸ்டிக் கவரில் போட்டு, அரை மணி நேரம் கழித்து அது சாப்பிடுபவர்களிடம் கொண்டு சேர்க்கப்படுகிறது. அதை மீண்டும் சூடு செய்து சாப்பிடுபவர்களும் இருக்கிறார்கள்.அதுவும் தவறுதான். 60 டிகிரி வெப்பத்திற்கு மேல் இருக்கும் உணவை பிளாஸ்டிக் கவரில் வைப்பது உடல் ஆரோக்கியத்திற்கு ஆபத்தானது. என்கிறார்.