தமிழக வெற்றிக் கழகம் மாநாடு
நடிகர் விஜய் தமிழக வெற்றிக் கழகம் என்ற கட்சியை கடந்த பிப்.2-ம் தேதி தொடங்கினார். கட்சி தொடங்கியதில் இருந்து உறுப்பினர் சேர்க்கை, மாநில நிர்வாகிகள் நியமனம், கட்சி கொடி, பாடல் அறிமுகம் உள்ளிட்ட பல்வேறு பணிகளை மேற்கொண்டு வந்த அவர், பிரம்மாண்ட மாநாடு நடத்தவும் திட்டமிட்டிருந்தார். அதன்படி, விழுப்புரம் மாவட்டம் விக்கிரவாண்டியில் சென்னை - திருச்சி தேசிய நெடுஞ்சாலையில் அமைந்துள்ள வி.சாலை என்ற கிராமத்தில் 85 ஏக்கர் நிலத்தை மாநாடு நடத்துவதற்கு அக்கட்சியினர் தேர்வு செய்தனர். இந்நிலையில், தமிழக வெற்றிக் கழகத்தின் முதல் அரசியல் மாநில மாநாடு அக்.27-ம் தேதி நடைபெறும் என அக்கட்சியின் தலைவர் நடிகர் விஜய் அதிகாரப்பூர்வமாக அறிவித்தார்.
தமிழக வெற்றிக்கழகத்தின் முதல் அரசியல் மாநாடு 27 ஆம் தேதி விக்கிரவாண்டி வி.சாலையில் அக்கட்சியின் தலைவர் விஜய் தலைமையில் 85 ஏக்கர் பரப்பளவில் நடைபெற உள்ளது. மாநாட்டிற்கான மேடை அமைக்கும் பணிகளில் 500 க்கும் மேற்பட்ட தொழிலாளர்கள் தீவிரமாக ஈடுபட்டுள்ளனர்.
சினிமாவிற்கு குட் பை
விஜய் நடிப்பில் கடைசியாக தி கோட் திரைப்படம் வெளியானது. அடுத்தபடியாக விஜய் எச்.வினோத் இயக்கத்தில் தளபதி 69 படப்பிடிப்பை தொடங்கியுள்ளார். தனது கடைசி படத்தில் விஜயை கடைசியாக ஒரு முறை திரையரங்கில் பார்க்க ரசிகர்கள் ஆர்வமாகவும் அதே நேரம் வருத்தத்துடனும் காத்திருக்கிறார்கள். விஜயின் அரசியல் பயணத்திற்கு வாழ்த்து தெரிவிக்கும் விதமாக தி கோட் படக்குழுவினர் சிறப்பு வீடீயோ ஒன்றை வெளியிட்டுள்ளார்.
தளபதி 69
தளபதி 69 படத்தை கே.வி.என் ப்ரோடக்ஷன்ஸ் தயாரிக்கிறது. கத்தி , மாஸ்டர் , லியோ படத்திற்கு பின் அனிருத் இந்த படத்திற்கு இசையமைக்கிறார். கடந்த செப்டம்பர் 14 ஆம் தேதி இப்படத்தின் அறிவிப்பு வெளியானது. இதன் பின் படக்குழுவினர் அறிவிக்கப்பட்டு படத்தின் பூஜை அக்டோபர் 4 ஆம் தேதி நடைபெற்று படப்பிடிப்பு தொடங்கியது. பாபி தியோல் , பூஜா ஹெக்டே , பிரகாஷ் ராஜ் , மமிதா பைஜூ , நரேன் , கெளதம் மேனன் , பிரியாமணி உள்ளிட்டவர்கள் இப்படத்தில் நடிக்கிறார்கள்.