தமிழ் திரையுலகின் முன்னணி நடிகராக இருப்பவர் விஜய். இவர் நடிப்பில் கடைசியாக பீஸ்ட் திரைப்படம் வெளியாகியிருந்தது. இந்த படத்திற்கு பிறகு இவர் தற்போது தெலுங்கு திரையுலகின் பிரபல இயக்குனர் வம்சி பைடபள்ளி இயக்கத்தில் நடித்து வருகிறார். இன்னும் பெயரிடப்படாத இந்த படத்தின் படப்பிடிப்பு ஹைதராபாத்தில் நடைபெற்று வருகிறது.
இந்த படத்திற்கு பிறகு நடிகர் விஜய் மீண்டும் லோகேஷ் கனகராஜ் இயக்கத்தில் நடிக்க உள்ளார். விக்ரம் படத்திற்கு கிடைத்த பிரம்மாண்ட வரவேற்பால் லோகேஷ் கனகராஜ் இயக்கப்போகும் தளபதி 67 படத்திற்கு மிகப்பெரிய எதிர்பார்ப்பு இப்போதே உருவாகியுள்ளது. இந்த நிலையில், தளபதி 67 படத்தின் நாயகியாக பிரபல நடிகை சமந்தா நடிக்க உள்ளதாக தகவல் வெளியாகியுள்ளது.
தமிழ் மட்டுமின்றி தெலுங்கிலும் பிரபல நடிகையாக வலம் வருபவர் சமந்தா. இவர் நடிகர் விஜய்யுடன் தெறி, மெர்சல் மற்றும் கத்தி ஆகிய படங்களில் ஏற்கனவே நடித்துள்ளார். சமந்தா விஜய்யுடன் நடித்த அனைத்து படங்களும் மெகா ஹிட்டானவை என்பதால் இந்த வெற்றிக்கூட்டணி இந்த படத்திற்கு மிகப்பெரிய பலமாக ரசிகர்களால் பார்க்கப்படுகிறது.
தளபதி 67 படம் விக்ரம் படத்தை போல கேங்ஸ்டர் படமாக இருக்குமா? அல்லது முற்றிலும் மாறுபட்ட திரைக்கதையா? என்று ரசிகர்கள் ஆவலுடன் உள்ளனர். நடிகர் விஜய்யின் தளபதி 66-ல் நடிகர் விஜய்யுடன் சரத்குமார், ஷாம், ராஷ்மிகா மந்தனா என மிகப்பெரிய நட்சத்திர பட்டாளமே நடித்து வருகின்றனர். இந்த படம் ஒரு குடும்பப்பாங்கான 2000-ம் காலகட்டங்களில் வந்த நடிகர் விஜய்யின் திரைப்படங்களை போல குடும்ப உறவுகளுக்கு முக்கியத்துவம் அளிக்கும் திரைப்படமாக இந்த படம் அமையும் என்று ரசிகர்கள் எதிர்பார்ப்புடன் உள்ளனர்.
அதேசமயம், லோகேஷ் கனகராஜ் கூட்டணியில் உருவாகும் படம் வித்தியாசமான ஆக்ஷன் படமாக அமையும் என்று எதிர்பார்க்கப்படுகிறது. விக்ரம் படத்தில் லோகேஷ் கனகராஜூன் திரைக்கதைக்கு கிடைத்த பாராட்டால் தளபதி 67-க்கு மிகப்பெரிய எதிர்பார்ப்பு உருவாகியுள்ளது என்பது குறிப்பிடத்தக்கது. புஷ்பா படத்தில் இடம்பெற்ற ம்ம்ம் சொல்றியா.. ம்ம்ம் சொல்றியா.. பாடல் மூலம் இந்தியா முழுவதும் பிரபலமான சமந்தா தமிழில் கடைசியாக காத்துவாக்குல ரெண்டு காதல் படத்தில் நடித்திருந்தார். நயன்தாராவுடன் நடித்த அந்த படத்தில் சமந்தாவின் கதீஜா கதாபாத்திரத்திற்கு ரசிகர்கள் பெருத்த வரவேற்பு அளித்திருந்தனர். தற்போது அவர் தெலுங்கு நடிகர் விஜய் தேவரகொண்டாவுடன் இணைந்து குஷி என்ற படத்தில் நடித்து வருகிறார் என்பது குறிப்பிடத்தக்கது.
ABP நாடு செய்திகளை சமூக வலைத்தள பக்கங்களிலும் பின் தொடரலாம்