சன் தொலைக்காட்சிக்கு என்று பல ஆண்டுகளாக குறிப்பிட்ட ரசிகர்கள் பட்டாளம் இருந்து கொண்டு இருக்கிறார்கள். அதற்கு காரணம் சன் தொலைக்காட்சியில் ஒளிபரப்பான எவர்கிரீன் சீரியல்களே காரணம் ஆகும். அந்த வகையில் கடந்த சில ஆண்டுகளில் சன் தொலைக்காட்சியின் ஆஸ்தான தொடராக திகழ்ந்தது எதிர்நீச்சல் சீரியல்.
எதிர்நீச்சல் தொடர்:
இந்த சீரியலின் ஆதி குணசேகரனாக வில்லன் கதாபாத்திரத்தில் நடித்த மாரிமுத்துவே இதற்கு முக்கிய காரணம் ஆகும். இவரும், இவருடைய தம்பிகளும் தங்களது மனைவிகளை எப்படி அடிமையாக வைத்துள்ளனர்? அதில் இருந்து அவர்கள் எப்படி மீள்கிறார்கள்? என்பதே இதன் மையக்கரு ஆகும்.
முழு வேகத்தில் விறுவிறுப்பாக சென்ற இந்த தொடர் மாரிமுத்து திடீரென மாரடைப்பால் உயிரிழந்த பிறகு ரசிகர்கள் மத்தியில் வரவேற்பை இழந்தது. பின்னர், இந்த தொடரை அவசரம் அவசரமாக முடிவுக்கு கொண்டு வந்துவிட்டனர். இந்த சூழலில், எதிர்நீச்சல் தொடரின் இரண்டாவது பாகம் வருவதாக தகவல்கள் தொடர்ந்து வெளியாகிக் கொண்டிருந்தது. இதையடுத்து கடந்த சில வாரங்களுக்கு முன்பு எதிர்நீச்சல் தொடரின் இரண்டாம் பாகம் உருவாக இருப்பது உறுதி செய்யப்பட்டது.
ஜனனி தந்த ஷாக்:
இந்த இன்பமான செய்திக்கு மகிழ்ச்சி அடைவதற்குள் ரசிகர்களுக்கு பேரதிர்ச்சி செய்தி ஒன்று வந்துள்ளது. எதிர்நீச்சல் தொடரில் ஆதி குணசேகரனுக்கு எதிராக அந்த வீட்டு மருமகள்களுக்கு உந்துசக்தியாக இருந்த ஜனனி கதாபாத்திரத்தில் நடித்த மதுமிதா எதிர்நீச்சல் 2ம் பாகத்தில் நடிக்கவில்லை என்று அதிகாரப்பூர்வமாக தெரிவித்துள்ளார்.
சில தனிப்பட்ட காரணங்களுக்காக எதிர்நீச்சல் 2ம் பாகத்தில் இருந்து விலகுவதாக தனது இன்ஸ்டாகிராம் பக்கத்தில் அவர் பதிவிட்டுள்ளார். அவரது பதிவில், புதிய சகாப்தம் தொடங்குகிறது. அன்புள்ள ரசிகர்களே எதிர்நீச்சல் 2ம் பாகத்தில் நான் சில காரணங்களால் நீடிக்கப்போவதில்லை என்று தெரிவிக்கிறேன். உங்களது எல்லையில்லா அன்பிற்கு ஒவ்வொருவருக்கும் நன்றி தெரிவிக்கிறேன் என்றும் பதிவிட்டுள்ளார்.
உங்கள் அன்பு மற்றும் காதல் எனக்கு பெருமை கொடுத்தது. இதுவரைக்கும் துணையாகவும், இன்று நாளிலும் என்னை தொடர்ந்து போகும் என்று பதிவிட்டுள்ளார். எதிர்நீச்சல் தொடரில் நடித்ததன் மூலம் பிரபலமான நடிகை மதுமிதாவிற்கு ஏராளமான ரசிகர்கள் உள்ளனர். இவர் தற்போது எதிர்நீச்சல் 2ம் பாகத்தில் இருந்து விலகியிருப்பது ரசிகர்களுக்கு அதிர்ச்சியை ஏற்படுத்தியுள்ளது.
பெங்களூரில் பிறந்த நடிகை மதுமிதா கன்னடத்தில் ஏராளமான தொடர்களில் நடித்த பிறகு தமிழில் ஜீ தமிழ் தொலைக்காட்சியில் ஒளிபரப்பான பிரியாத வரம் வேண்டும் என்ற தொடரில் நடித்தார். பின்னர், 2022ம் ஆண்டு முதல் ஒளிபரப்பான எதிர்நீச்சல் தொடரில் நடித்து தமிழ் ரசிகர்கள் மத்தியில் மிகவும் பிரபலமானார்.
எதிர்நீச்சல் தொடர் 2ம் பாகத்தில் யார்? யார்? நடிக்க இருக்கிறார்கள் என்ற அறிவிப்பை இயக்குனர் திருச்செல்வன் விரைவில் அறிவிப்பார் என்று எதிர்பார்க்கப்படுகிறது.