ஜூனியர் என்டிஆரின் உறவினரும் நடிகருமான நந்தமுரி தாரகா ரத்னா அரசியல் பேரணியின் போது மாரடைப்பு காரணமாக மயங்கி விழுந்தார். இதையடுத்து அவர் அவசர சிகிச்சைப்பிரிவில் அனுமதிக்கப்பட்டுள்ளார். உயிருக்கு ஆபத்தான நிலையில் அவருக்கு சிகிச்சை அளிக்கப்பட்டு வருவதாக தகவல்கள் வெளியாகியுள்ளன.
ஆர்.ஆர்.ஆர் படத்தின் நடிகர் ஜூனியர் என்.டி.ஆரின் உறவினர் நந்தமுரி தாரகா ரத்னா. இவர் சித்தூர் மாவட்டத்தில் அரசியல் பேரணியில் கலந்து கொண்டார். அப்போது அவர் திடீரென மாரடைப்பு ஏற்பட்டு கீழே மயங்கி விழுந்தார். இதையடுத்து அங்கிருந்தவர்கள் அவரை மீட்டு அவசர சிகிச்சைக்காக மருத்துவமனைக்கு அனுப்பி வைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. முன்னாள் முதலமைச்சர் சந்திரபாபு நாயுடுவின் மகன் லோகேஷ் தொடங்கிய அரசியல் பேரணியில் தாரகா கலந்து கொண்ட போது இந்த துயர சம்பவம் நிகழ்ந்துள்ளது. அவரை மருத்துவமனைக்கு கொண்டு செல்லும் வீடியோ சமூக வலைதளங்களில் வெளியாகி உள்ளது.
இதுகுறித்து தாரகா ரத்னாவின் மாமா பாலகிருஷ்ணா கூறுகையில், “தாரகா ரத்னாவுக்கு மாரடைப்பு ஏற்பட்டுள்ளது. அவரின் வால்வுகளில் அடைப்பு உள்ளது.கவலைப்பட ஒன்றும் இல்லை. மருத்துவர்கள் தங்களால் முடிந்த அளவு முதலுதவி கொடுத்து சிகிச்சை அளித்து வருகின்றனர். அவரை பெங்களூருவுக்கு அழைத்துச்செல்லும்படி மருத்துவர்கள் பரிந்துரை செய்துள்ளனர்” எனத் தெரிவித்தார்.
39 வயதே ஆகும் நடிகர் தாரகா ரத்னா 2002 ஆம் ஆண்டு வெளியான தெலுங்கு திரைப்படமான ஒகடோ நம்பர் குர்ராடுவில் நடிகராக அறிமுகமானார். அவர் தாரக், பத்ரி ராமுடு, மனமந்தா மற்றும் ராஜா செய் வேஸ்தே போன்ற படங்களில் நடித்ததன் மூலம் பிரபலமானார். அவர் சமீபத்தில் டிஸ்னி+ ஹாட்ஸ்டாரின் தெலுங்கு வெப் சீரிஸ் 9 ஹவர்ஸில் நடித்திருந்தார்.