நடிகர் சூர்யா நடிப்பில், இயக்குநர் பாண்டிராஜ் இயக்கத்தில் வெளியாக உள்ள எதற்கும் துணிந்தவன் படத்தின் டீசர் வெளியாகியுள்ளது.
தொடர்தோல்வி
தொடர் தோல்விகளால் மார்க்கெட் சரிவை சந்தித்துக்கொண்டிருந்த சூர்யாவிற்கு, ஓடிடியில் வெளியான சூரரைப்போற்று படம் நல்ல வரவேற்பை பெற்றது. இதைத்தொடர்ந்து வந்த ஜெய்பீம் படம், மிகப்பெரிய வெற்றியை பெற்றதோடு, ஆஸ்கர் விருது பட்டியலிலும் இடம்பிடித்த நிலையில் சூர்யா உலக அளவில் கவனம் பெற்றார்.இந்த இரண்டு படங்களின் வெற்றியால் சூர்யாவின் மார்க்கெட் மீண்ட நிலையில், அடுத்ததாக வெளியாக இருக்கும் சூர்யாவின் ‘ ‘எதற்கும் துணிந்தவன்’ படம் ரசிகர்கள் மத்தியில் எதிர்பார்ப்பை எகிறவைத்திருக்கிறது.
பாண்டிராஜ் இயக்கத்தில் உருவாகியுள்ள இந்தப்படத்தில் சூர்யாவுடன் சத்யராஜ் முக்கிய கதாபாத்திரத்தில் நடித்துள்ளார். படத்தின் கதாநாயகியாக, பிரியங்கா மோகனன் நடித்துள்ள நிலையில், வில்லனாக நடிகர் வினய் நடித்திருக்கிறார்.
5 மொழிகளில் வெளியாக இருக்கும் இந்தத்திரைப்படம் அடுத்த மாதம் 10 ஆம் தேதி வெளியாக உள்ளது. பெண்களுக்கு எதிராக நடக்கும் அநீதியை தட்டிக்கேட்கும் நாயகனாக சூர்யா நடித்திருப்பதாக படத்தின் இயக்குநர் பாண்டிராஜ் கூறியிருக்கிறார். டி. இமான் இசையமைத்திருக்கும் இந்தப்படத்தின் பாடல்கள் மற்றும் பின்னணி இசை ரசிகர்கள் மத்தியில் கவனம் பெற்ற நிலையில், தற்போது படத்தின் டீசர் வெளியிடப்பட்டிருக்கிறது