நடிகர் சிவகார்த்திகேயன் நடித்துள்ள பிரின்ஸ் படத்தில் இருந்து Who Am I ? பாடலின் வரிகள் அடங்கிய வீடியோ வெளியாகியுள்ளதால் ரசிகர்கள் மகிழ்ச்சியடைந்துள்ளனர்.
தெலுங்கு திரைப்படமான ‘ஜாதி ரத்னாலு’ படத்தின் இயக்குநர் அனுதீப் இயக்கத்தில் ‘பிரின்ஸ்’ படத்தில் சிவகார்த்திகேயன் நடித்துள்ளார். இந்த படத்தின் ஃபர்ஸ்ட் லுக் மற்றும் டைட்டில் போஸ்டர் கடந்த ஜூன் மாதம் வெளியாகியிருந்தது. இப்படத்தில் நடிகை மரியா, நடிகர் சத்யராஜ் மற்றும் பலர் நடித்து வருகின்றனர். தமன் இசையமைக்கும் பிரின்ஸ் படம் இந்தாண்டு தீபாவளிக்கு வெளியீடாக இருக்கும் என முன்பு தெரிவிக்கப்பட்டது.
இதனிடையே பிரின்ஸ் படத்தில் முதல் பாடலான பிம்பிலிக்கி பிலாக்கி கடந்த செப்டம்பர் 1 ஆம் தேதியும், 2 ஆம் பாடலாக ஜெஸிக்கா பாடல் செப்டம்பர் 23 ஆம் தேதியும் வெளியானது. தொடர்ந்து செப்டம்பர் 30 ஆம் தேதி தான் படத்தின் ஷூட்டிங் முடிவடைந்தது. தீபாவளிக்கு 24 நாட்களே இருந்த நிலையில் படம் திட்டமிட்டபடி வெளியாகுமா என்ற கேள்வி எழுந்தது. ஆனால் தீபாவளிக்கு கண்டிப்பா ரிலீஸ் என்ற தகவலோடு ரிலீஸ் நாளாக அக்டோபர் 21 ஆம் தேதி அறிவிக்கப்பட்டது.
தொடர்ந்து பிரின்ஸ் படத்தின் ட்ரெய்லர் அக்டோபர் 9 ஆம் தேதி வெளியாகி நல்ல வரவேற்பை பெற்றது. படத்துக்கான ப்ரோமோஷன்களும் தொடங்கியுள்ள நிலையில், தன்னுடைய முதல் தீபாவளி வெளியீட்டு படம் என்பதால் சிவகார்த்திகேயனும் மிகுந்த ஆவலோடு பிரின்ஸ் படத்தை எதிர்பார்த்து காத்திருக்கிறார்.
இந்நிலையில் பிரின்ஸ் படத்தில் இருந்து Who Am I ? பாடலின் வரிகள் அடங்கிய வீடியோ வெளியாகியுள்ளது. இந்த பாடல் ரசிகர்களை பெரிதும் கவர்ந்துள்ள நிலையில் சிவகார்த்திகேயன் டான்ஸூம் சூப்பராக உள்ளது.