பண்டிகை கொண்டாட்டம் துவங்கியாச்சு என்றாலே எந்த அளவுக்கு புது துணி, பட்டாசு, இனிப்பு நிச்சயம் இடம்பெறுமோ அதே போல புது படங்களில் ரிலீஸும் மிகவும் எதிர்பார்க்கப்படும் ஒன்று. அந்த வகையில் விநாயகர் சதுர்த்தி ஸ்பெஷல் திரைப்படமாக வெங்கட் பிரபு - விஜய் கூட்டணியில் 'தி கோட்' படம் வெளியாக உள்ளது என்றால் ஆயுத பூஜை கொண்டாட்டமாக சூப்பர் ஸ்டார் ரஜினிகாந்தின் 'வேட்டையன்', சூர்யாவின் 'கங்குவா' படங்கள் வெளியாக தயாராக உள்ளன. அடுத்தது என்ன தீபாவளி தானே.
ஒவ்வொரு ஆண்டும் தீபாவளிக்கு என்னென்ன படங்கள் வெளியாகும்? எந்தெந்த ஹீரோக்கள் களத்தில் மோத போகிறார்கள்? யாருடைய படம் கலெக்ஷனை அள்ளும் இப்படி பல கேள்விகளும் யூகங்களும் ஆண்டு துவங்கிய உடனே ஆரம்பித்து விடும். பொதுவாக பெரிய நடிகர்களின் படங்களை தீபாவளிக்கு எதிர்பார்க்கலாம். ஆனால் இந்த முறை தீபாவளிக்கு முன்னரே விஜய், ரஜினிகாந்த் படங்கள் வெளியாகி விடுகின்றன. அந்த வகையில் இந்த ஆண்டு தீபாவளிக்கு வெளியாகும் படங்களை பற்றி பார்க்கலாம்.
அமரன் :
கமல்ஹாசனின் ராஜ்கமல் ஃபிலிம்ஸ் இண்டர்நேஷனல் மற்றும் சோனி பிக்சர்ஸ் இணைந்து தயாரிக்க ராஜ்குமார் பெரியசாமி இயக்கத்தில் நடிகர் சிவகார்த்திகேயன் நடித்துள்ள திரைப்படம் 'அமரன்'. ராணுவ மேஜர் முகுந்த் வரதராஜனின் வாழ்க்கையை மையமாக கொண்டு உருவாகியுள்ள இப்படத்தில் சிவகார்த்திகேயன் ராணுவ வீரராக நடித்துள்ளார். சாய் பல்லவி ஹீரோயினாக நடிக்க ஜி.வி பிரகாஷ் இசையமைத்துள்ளார். இதுவரையில் சிவகார்த்திகேயன் நடித்த படங்களிலேயே படம் வெளியாவதற்கு முன்னரே அதிக தொகைக்கு விற்பனையான முதல் படம் இதுவாகும். தீபாவளியை முன்னிட்டு இப்படம் அக்டோபர் 31ம் தேதி திரையரங்கில் வெளியாக உள்ளது.
பிரதர் :
சிவா மனசுல சக்தி, பாஸ் என்ற பாஸ்கரன் போன்ற அல்டிமேட் படங்களை இயக்கிய ராஜேஷ் இயக்கத்தில் ஜெயம் ரவி நடிப்பில் உருவாகியுள்ள திரைப்படம் 'பிரதர்'. ஸ்கிரீன் சீன் மீடியா என்டர்டெயின்மென்ட் நிறுவனத்தின் தயாரிப்பில் பிரியங்கா மோகன் ஹீரோயினாக நடிக்க ஹாரிஸ் ஜெயராஜ் இசையமைத்துள்ளார். அடுத்தடுத்து ராஜேஷ் இயக்கிய படங்கள் தோல்வி அடைந்ததால் இந்த படம் நிச்சயம் வெற்றி படமாக அமைந்து அவருக்கு கம்பேக் கொடுக்கும் என எதிர்பார்க்கப்படுகிறது. இப்படம் அக்டோபர் 31ம் தேதி வெளியாக உள்ளது.
பிளடி பெக்கர் :
சின்னத்திரையில் இருந்து வெள்ளித்திரையில் என்ட்ரி கொடுத்து சூப்பராக பயணித்து வரும் நடிகர்களில் ஒருவரான கவின் லிஃப்ட், டாடா, ஸ்டார் படங்களை தொடர்ந்து தற்போது அவர் நடிப்பில் வெளியாக இருக்கும் திரைப்படம் 'பிளடி பெக்கர்'. இயக்குநர் நெல்சன் திலீப்குமாரிடம் உதவி இயக்குநராக இருந்த சிவபாலன் இயக்கத்தில் உருவாகியுள்ள இப்படம் தீபாவளியை முன்னிட்டு வரும் அக்டோபர் 31ம் தேதி வெளியாக உள்ளது.
லக்கி பாஸ்கர் :
'வாத்தி' படத்தின் மூலம் பிரபலமான இயக்குநர் வெங்கி அட்லூரி இயக்கத்தில் நடிகர் துல்கர் சல்மான், மீனாட்சி சவுத்ரி லீட் ரோலில் நடித்துள்ள திரைப்படம் 'லக்கி பாஸ்கர்'. ஜிவி பிரகாஷ் இசையமைத்துள்ள இப்படத்தை சித்தாரா என்டர்டெயின்மென்ட் நிறுவனம் தயாரித்துள்ளது. செப்டம்பர் 27ம் தேதி வெளியாக இருந்த இப்படம் ஒரு சில காரணங்களால் ஒத்திவைக்கப்பட்ட நிலையில் அக்டோபர் 31ம் தேதி வெளியாக உள்ளது.