ஷாருக்கான், தீபிகா படுகோன் நடிப்பில் வெளியாக இருக்கும் திரைப்படம் 'பதான்'. முன்னதாக பதான் திரைப்படத்தின் முதல் பாடல் இன்று வெளியாகும் என அறிவிக்கப்பட்டிருந்த நிலையில், 'பேஷரம் ரங்' என்ற அந்த பாடல் தற்போது வெளியாகி உள்ளது. பாடல் வெளியான கொஞ்ச நேரத்திலேயே மூன்று மில்லியன் வியூவ்ஸை எட்டியுள்ளது.



பாடலில் இடம்பெற்றுள்ள தீபிகாவின் கவர்ச்சியான தோற்றம் ரசிகர்களின் கவனத்தை ஈர்த்துள்ளது. 


பாலிவுட்டில் ஷாருக்கானின் ’ஓம் சாந்தி ஓம்’ படத்தில் அறிமுகமான தீபிகா, அதன் பிறகு நிகழ்த்தியதெல்லாம் வரலாறு!


தன் முதல் படத்திலேயே ஒட்டுமொத்த இந்திய ரசிகர்களையும் தன் சிரிப்பால் கட்டிப்போட்ட டஸ்கி அழகி தீபிகா, தொடர்ந்து ’சென்னை எக்ஸ்பிரஸ்’, ’ஹேப்பி நியூ இயர்’ என தன் கரியரின் வெவ்வேறு கட்டங்களிலும் தன்னை அறிமுகப்படுத்திய ஷாருக்கானுடன் தொடர்ந்து நடித்து வந்துள்ளார்.


ரசிகர்களின் ஆதர்ச ஜோடியாக மாறிப்போன ஷாருக் - தீபிகா, தற்போது மீண்டும் ’பதான்’ படத்தில் இணைந்துள்ளனர்.






யாஷ் ராஜ் ஃபிலிம்ஸ் தயாரிப்பில் உருவாகும் இந்தப்படம் இந்தி மட்டுமல்லாமல் தமிழ், தெலுங்கு மொழிகளிலும் உருவாகியுள்ளது. சித்தார்த் ஆனந்த் இந்தப் படத்தை இயக்கியுள்ள நிலையில், 2023 ஜனவரி, 25ஆம் தேதி திரைக்கு வரும் என அறிவிக்கப்பட்டுள்ளது.


முன்னதாக ஷாருக்கானின் பிறந்த நாளை முன்னிட்டு ’பதான்’ ட்ரெய்லர் வெளியாகி ரசிகர்களைக் கவர்ந்த நிலையில், இன்று இந்தப் படத்தின் முதல் பாடலான ’பேஷரம் ரங்’ வெளியாகி உள்ளது. ஏற்கனவே இப்படம் குறித்த எதிர்பார்ப்புகள் ரசிகர்களிடையே எகிறியுள்ள நிலையில், இப்பாடலில் இடம்பெறும் தீபிகாவின் அசத்தலான லுக் சில தினங்களுக்கு முன் இணையத்தில் வெளியாகி வைரலானது.


நீச்சல் உடையில் தீபிகா இந்த போஸ்டரில் கிறங்கடிக்கும் நிலையில், தீபிகா அனைவரையும் விட கவர்ச்சியானவர் எனப் புகழ்ந்து ஷாருக் தன் இன்ஸ்டா பக்கத்தில் பகிர்ந்திருந்தார்.






சென்னை எக்ஸ்பிரஸ் படத்தில் கோலிவுட் சூப்பர் ஸ்டார் ரஜினிகாந்தை கவுரவிக்கும் வகையில் ஷாருக் - தீபிகா இணைந்து கலக்கிய ’தலைவா’ பாடல் பெரும் ஹிட் ஆக அமைந்தது. இந்நிலையில் சுவாரஸ்யமான விஷயமாக, ரஜினி பிறந்தநாளான இன்று பதான் பட பாடல் வெளியாகி உள்ளது.


’பதான்’ தவிர தன் கணவர் ரன்வீர் சிங் உடன் தீபிகா நடித்துள்ள ’சர்க்கஸ்’ படமும் விரைவில் வெளியாக உள்ளது. முன்னதாக இப்படத்தில் தீபிகா - ரன்வீர் இணைந்து கலக்கிய ’கரண்ட் லகாரே’ என்ற பாடல் யூடியூப் தளத்தில் வெளியாகி ஹிட் அடித்தது குறிப்பிடத்தக்கது.