ஷாருக்கான், தீபிகா படுகோனே, ஜான் ஆபிரகாம் ஆகியோர் நடிப்பில் வெளியாகி இந்த ஆண்டின் பிளாக் பஸ்டர் படமாக அமைந்துள்ளது ’பதான்’ . இப்படத்தை சித்தார்த் ஆனந்த் எழுதி இயக்க, யாஷ் ராஜ் பிலிம்ஸ் நிறுவனம் தயாரித்துள்ளது. இது YRF ஸ்பை யுனிவர்ஸின் நான்காவது பாகமாகும்.
கடந்த 2018ஆம் ஆண்டு வெளியான ஜீரோ படத்திற்கு பிறகு ஷாருக் கான் இந்த படத்தில் நடித்துள்ளார். இப்படம் தமிழ் மற்றும் தெலுங்கில் டப்பிங் செய்யப்பட்டு கடந்த ஜனவரி 25, 2023 அன்று வெளியிடப்பட்டது. இந்தப் படத்தில் சல்மான் கான் கேமியோ ரோலில் நடித்தார்.
இப்படத்தில் ஷாருக்கான் RAW பீல்ட் ஏஜெண்டான பதான் ஆக நடித்துள்ளார். பதான் படத்தின் இசையை விஷால்-சேகர் இசையமைக்க, சஞ்சித் பல்ஹாரா மற்றும் அங்கித் பல்ஹாரா ஆகியோர் பின்னணி இசையமைத்துள்ளனர்.
பதான் படம் வெளியாவதற்கு முன்பே பல்வேறு எதிர்ப்புகள் எழுந்த நிலையிலும், சர்ச்சைகளுக்கு மத்தியிலும் பலத்த வரவேற்புடன் படம் வெளியானது. சுமார் 10 ஆண்டுகளுக்குப் பிறகு ஷாருக்கானின் திரைப்படம் பிளாக்பஸ்டர் ஹிட் அடித்தது அவரது ரசிகர்களுக்கு மகிழ்ச்சியை அளித்ததுடன், அதே அளவிற்கு வசூலிலும் பல சாதனைகளை படைத்து வருகிறது. உலக அளவில் ரூ.1000 கோடி வசூல், இந்தித் திரைப்படங்களில் அதிக வசூல் போன்ற பல சாதனைகளை இப்படம் புரிந்துள்ளது.
சோட்டா பதான்..
இந்நிலையில், பதான் படத்தின் ’ஜூமே ஜோ பதான்’ என்ற ஹிட் பாடலுக்கு ஆட்டம்போட்ட கிரிக்கெட் வீரர் இர்ஃபான் பதானின் குழந்தைக்கு ’சோட்டா பதான்’ என்று பட்டம் கொடுத்து மகிழ்ச்சியை தெரிவித்துள்ளார் நடிகர் ஷாருக்கான்.
இர்ஃபான் பகிர்ந்த ட்வீட்:
முன்னதாக இர்ஃபான் பதான் பகிர்ந்த ட்வீட்டில் தனது மகனின் க்யூட்டான நடனம் அடங்கிய வீடியோவை போஸ்ட் செய்ததுடன் அதில் ஷாருக்கானை டேக் செய்து, ”கான் சார் உங்கள் ரசிகர்கள் பட்டியலில் இன்னுமொரு க்யூட்டான ரசிகரை சேர்த்துக் கொள்ளுங்கள்” என்று குறிப்பிட்டிருந்தார். இந்த வீடியோவை பலரும் ரசித்து, பகிர்ந்து, பின்னூட்டங்களை பதிவிட்டு வருகின்றனர்.
ரீஷேர் செய்த ஷாருக்கான்:
இந்நிலையில், இந்த வீடியோவை ரீஷேர் செய்த ஷாருக்கான், ”இவர் உங்களைவிட இன்னும் அதிகமான திறமைகளைக் கொண்டுள்ளார்” என்று கூறியதுடன் ’சோட்டா பதான்’ என்று அடைமொழியும் கொடுத்து பதிவிட்டுள்ளார். ஷாருக்கானின் இந்த ட்வீட்டை ரசிகர்கள் கொண்டாடி வருகின்றனர். ஷாருக் ரசிகர்கள் ஒருபுறம், இர்ஃபான் பதான் ரசிகர்கள் மறுபுறம் என மாறி மாறி ஷேர் செய்ய இந்த வீடியோ வைரலாகி வருகிறது.
ஓடிடியிப் பதான்..
முன்னதாக கடந்த புதன் கிழமை, அமேசான் ப்ரைம் வீடியோவில் பதான் வெளியானது குறித்து ஷாருக்கான் தனது ட்விட்டரில் பக்கத்தில் பதிவிட்டிருந்தார் என்பது குறிப்பிடத்தக்கது.