பலவருடங்களாக சினிமாவில் சிறு சிறு கதாபாத்திரங்கள் செய்து வந்த நடிகர் சுவாமிநாதன். லொள்ளுசபாவில் வெளிச்சம் பட்டு காமெடி உலகிற்குள் வந்தார். அதன் பிறகு அவரும் சந்தானமும் இணைந்து செய்த காமெடிகள் நாம் வயிறு குலுங்க குலுங்க ரசித்தவைகள் ஆகும். பாஸ் என்கிற பாஸ்கரனில் ஆரியர் எக்ஸாம் எழுத வருவது, அரண்மனை திரைப்படத்தில் சமயக்காரராக குதித்து குதித்து வருவது, என கிட்டத்தட்ட எல்லா சந்தானம் திரைப்படத்திலும் இடம்பெற்றுவிடுவார்.
எல்லோருக்கும் லொள்ளுசபா சுவாமிநாதன் என்று அறியப்பட்ட இவர் வடிவேலுவுக்கு முன்னாலேயே நடிக்க வந்துள்ளார் என்பது இங்கு பலருக்கும் தெரியாத விஷயம். சமீபத்தில் வைரலாகியுள்ள ஒரு பேட்டியில் அவர் வடிவேலு குறித்து பேசியுள்ளார். "ராஜ்கிரண் சார் ஆபீஸ்ல ஆபீஸ் பாயா இருப்பாரு வடிவேலு. அப்போ 'தலைவா ஏதாவது சான்ஸ் இருந்தா சொல்லுங்க தலைவா'ன்னு சொல்லுவார். அப்புறம் அவர் சிங்காரவேலன் படத்துல நடிச்சாரு, நான் அதுல ஒரு போலீஸ் கேரக்டர் பண்ணிருப்பேன். அப்போலாம் கார்ல போகும்போது, நீ பின்னாடி ஜம்முன்னு உக்காரு தலைவா, நான் ட்ரைவரோட ஒண்டி உக்காந்துக்குறேன்னு சொல்லுவாரு. அப்படி இருந்தவர நான் அடுத்தது ஆறு படத்துலதான் பாக்குறேன். அதுல எனக்கு ஒரு சின்ன ரோல்தான். நடிக்கும்போது நிறுத்தி நிறுத்தி 'சரியா வர்லயே, திரும்ப பண்றீங்களா… ' அப்டின்னு திரும்ப திரும்ப நிறுத்தி நிறுத்தி கேட்டுகிட்டே இருந்தார். நான் சொன்னேன், 'சார் உங்களோட நடிப்பு எனக்கு ரொம்ப பிடிக்கும். உங்களை நான் ரொம்ப மதிக்குறேன். ஏதாவது இப்படி பண்ணலாம் அப்படி பண்ணலாம்ன்னா சொல்லுங்க மாத்திக்கலாம். அதுக்காக சும்மா சரியா வரல சரியா வரலன்னு சொல்லிகிட்டே இருக்காதீங்க.' ன்னு சொன்னதும். 'அப்படிலாம் அவர்கிட்ட பேச கூடாது' ன்னு எல்லாரும் மெதுவா சொல்றாங்க. டைரக்டர் அங்கிருந்து கண்ண காமிச்சார், 'அவர் சொல்றத கேட்டுக்க, நான் சொன்னத பண்ணிடு'ன்னார். நானும் பண்ணேன் ஷாட் ஓகே ஆயிடுச்சு. வடிவேலு வந்து 'என்ன ஓகே, சரியா வர்லயே'ன்னார். டைரக்டர் சார் 'இல்ல சார் உங்களுக்குதான் க்ளோஸ், அவருக்கு சின்ன ஷாட்தான் ஓகே தான் வாங்க'ன்னு சொன்னதும் 'அப்படியா சரி சரி'ன்னு வந்துட்டார்." என்று கூறினார்.
மேலும் அவர் எல்லா சீனியர் நடிகர்களுமே யாரையும் வளர விட மாட்டார்கள் என்ற குற்றச்சாட்டை வைத்தார். கவுண்டமணி இருக்கும்போது நிறைய பேர் கஷ்டப்பட்டுள்ளனர் என்று கூறினார். அவர் பேசுகையில், "நாகேஷ் சார், கவுண்டமணின்னு அவங்க அவங்க காலத்துல சீனியரா இருக்கும்போது ஜுனியர்கள வளரவிட மாட்டாங்க. ஆனால் செந்தில் சார் அப்படியல்ல, விவேக் சார் அப்படி அல்ல, சூரி சார் அந்த மாதிரி பண்ணமாட்டார். சிவகுமார் சார் நடிக்கும்போது சொல்லிக்கொடுத்துகிட்டே இருப்பாருன்னு சொல்லுவாங்க, ஆனா அவங்க ஷாட் நல்லா வரணும்ன்றதுக்காக அவ்வளவு மெனக்கெட்டு சொல்றாங்க, நமக்கு பார்க்க வேணும்னே பணரங்களோன்னு தோணும்." என்றார்.