சசிகுமார்
இயக்குநர் அமீரிடம் உதவி இயக்குநராக பணியாற்றிய சசிகுமார் 2008 ஆம் ஆண்டு வெளியான சுப்ரமணியபுரம் திரைப்படத்தின் மூலம் இயக்குநராக அறிமுகமானார். தமிழ் சினிமாவில் எல்லா காலத்திலும் கொண்டாடப்படும் கிளாசிக் திரைப்படமாக இப்படம் மாறியுள்ளது. இதனைத் தொடர்ந்து அவர் இயக்கிய ஈசன் படம் பெரியளவில் வெற்றிபெறவில்லை. அடுத்தடுத்து படங்களை இயக்க திட்டமிட்டிருந்த சசிகுமார் பின் திரைப்படங்களில் நடிக்கத் தொடங்கினார். நாடோடிகள் , சுந்தரபாண்டியன் , குட்டி புலி , கிடாரி , அயோத்தி , கருடன் என இவர் நடித்த படங்கள் ரசிகர்களிடம் நல்ல வரவேற்பைப் பெற்றுள்ளன. சமீபத்தில் வெளியான நந்தன் திரைப்படமும் விமர்சன ரீதியாக பாராட்டுக்களை பெற்றுள்ளது. இதனைத் தொடர்ந்து அவர் நடித்துள்ள ஃப்ரீடம் படத்தின் முன்னோட்டம் தற்போது வெளியாகியுள்ளது.
சசிகுமார் நடித்துள்ள ஃப்ரீடம்
சத்யசிவா இயக்கத்தில் உருவாகியுள்ள ஃப்ரீடம் திரைப்படத்தில் சசிகுமார் மற்றும் லிஜோமோல் ஜோஸ் முக்கிய கதாபாத்திரத்தில் நடித்துள்ளார்கள். மாளவிகா அவினாஷ் , போஸ் வெங்கட் , ரமேஷ் கண்ணா பிற கதாபாத்திரங்களில் நடித்துள்ளார்கள். பாண்டியன் பரசுராமன் இப்படத்தை தயாரித்துள்ளார். ஜிப்ரான் இசையமைத்துள்ளார். இலங்கையில் தமிழர்கள் மற்றும் சிங்களர்களுக்கு இடையில் நடந்த போர் அதனைத் தொடர்ந்து இந்தியாவில் நிகழ்ந்த ராஜீவ் காந்தி குண்டு வெடிப்பு உள்ளிட்ட உண்மை சம்பவங்களை மையப்படுத்தி இந்த படம் உருவாகியுள்ளது . ஃப்ரீடம் படத்தின் முன்னோட்டத்தை இயக்குநர் கார்த்தி சுப்பராஜ் வெளியிட்டுள்ளார்.