கோலிவுட்டின் சுப்ரீம் ஸ்டாராகக் கொண்டாடப்படும் நடிகர் சரத்குமார் இன்று தன் 69ஆவது பிறந்தநாளைக் கொண்டாடுகிறார். தமிழ் சினிமாவில் வில்லனாக தன் பயணத்தைத் தொடங்கி முக்கிய நடிகர்களுள் ஒருவராக உருவெடுத்தவர் நடிகர் சரத்குமார்.
பத்திரிகையாளர், பாடி பில்டர் என முதலில் தன் கரியரைத் தொடங்கிய சரத்குமார், சினிமாவைப் பொறுத்தவரை தெலுங்கில் தான் தன் திரைப்பயணத்தை முதன்முதலில் தொடங்கினார். தொடர்ந்து தமிழில் வில்லனாக நடிக்கத் தொடங்கிய சரத்குமார், மிகப்பெரும் திருப்புமுனையாக அமைந்தது விஜயகாந்த் உடன் அவர் இணைந்து நடித்த புலன் விசாரணை திரைப்படம்.
தொடர்ந்து பல படங்களில் பல கோலிவுட் கதாநாயகர்களுக்கும் வில்லனாக நடித்துக் கலக்கிய நடிகர் சரத்குமார், மெல்ல மெல்ல சில ஆண்டுகளில் ஹீரோவாக முன்னேறத் தொடங்கினார். அதன் பின் ‘ஐ லவ் இந்தியா’, ‘ரகசிய போலீஸ்’, ‘சூரியன்’ என ஆக்ஷன் அவதாரம் எடுத்த சரத்குமார், சுப்ரீம் ஸ்டார் பட்டம் பெற்று தமிழ் சினிமாவில் கோலோச்சத் தொடங்கினார்.
கே.எஸ்.ரவிக்குமார் உடன் ‘புரியாத புதிர்’ திரைப்படம் தொடங்கி வெற்றிகரமான கூட்டணியாக சரத்குமார் வலம் வந்தாலும், 1997ஆம் ஆண்டு வெளியான ‘சூர்ய வம்சம்’ திரைப்படம் தான் அவருக்கு மெகா ஹிட் படமாக அமைந்து அனைத்து தரப்பு ரசிகர்களையும் பெற்றுத்தந்தது.
அது முதல் ஆக்ஷன் நாயகனாக தமிழ் சினிமாவில் பல்வேறு மெகா ஹிட் படங்களைக் கொடுத்துள்ள நடிகர் சரத்குமார், மற்றொரும் புறம் நடிகர் சங்கத் தலைவராகவும் வலம் வந்து கோலிவுட்டின் தவிர்க்க முடியாத நடிகராக உருவெடுத்தார்.
சமீபகாலமாக நல்ல குணச்சித்திரக் கதாபாத்திரங்களைத் தேர்ந்தெடுத்து சரத்குமார் நடித்து வரும் நிலையில், போர் தொழில், பொன்னியின் செல்வன் உள்ளிட்ட படங்களில் இவரது கதாப்பாத்திரம் இன்றைய 2கே கிட்ஸ் ரசிகர்களையும் ஈர்த்து லைக்ஸ் அள்ளி வருகிறது.
கோலிவுட்டில் இப்படி 80களின் இறுதியில் தொடங்கி தற்போது வரை வெற்றிகரமாக வலம் வரும் சரத்குமார் இன்று தன் 69ஆவது பிறந்தநாளைக் கொண்டாடுகிறார்.
இந்நிலையில், சரத்குமாரின் மனைவி ராதிகா சரத்குமார் சரத்குமாரை வாழ்த்தி க்யூட்டான பதிவு ஒன்றைப் பகிர்ந்துள்ளார். சிங்கம் போன்ற உறுதியான இதயத்தைக் கொண்ட சரத்குமாருக்கு இனிய பிறந்தநாள் நல்வாழ்த்துக்கள், உங்கள் விடாமுயற்சியை என்றும் கைவிடாதீர்கள். என் இதயத்தின் அடி ஆழத்திலிருந்து உங்களுக்கு வாழ்த்துக்கள்” என ராதிகா பதிவிட்டுள்ளார். ராதிகாவின் இந்த க்யூட்டான பதிவு லைக்ஸ் அள்ளி வருகிறது.
நடிகைகள் ரம்பா, சுஜா வருணி உள்ளிட்ட பலரும் அவரது பதிவில் நடிகர் சரத்குமாருக்கு வாழ்த்து தெரிவித்து வருகின்றனர்.