ரஞ்சிதமே பாடல் ரிகர்சலில் சிங்கிள் டேக்கில் அசால்ட்டாக விஜய் நடனமாடி அசத்திய வீடியோ வெளியாகி வைரலாகியுள்ளது.
வாரிசு வசூல்:
விஜய் நடிப்பில் இயக்குனர் வம்சி பைடிபள்ளி இயக்கத்தில் ராஷ்மிகா மந்தனா, பிரகாஷ்ராஜ், சரத்குமார், பிரபு, ஷாம்,சங்கீதா,ஜெயசுதா, உள்ளிட்ட மிகப்பெரும் நட்சத்திரப் பட்டாளமே இணைந்து நடித்துள்ள வாரிசு படம் பொங்கல் வெளியீடாக ரிலீசானது. குடும்பங்கள் கொண்டாடும் படமாக தமிழ், தெலுங்கு, இந்தி என அனைத்து மொழிகளிலும் நல்ல வரவேற்பைப் பெற்ற வாரிசு படம் இதுவரை 300 கோடி ரூபாய்க்கும் மேல் வசூலித்துள்ளதாகத் தகவல்கள் வெளியாகியுள்ளன.
இப்படத்தில் முதன்முறையாக தமன் விஜய்யுடன் கூட்டணி அமைத்த நிலையில், படத்தில் இடம்பெற்ற பாடல்கள் அனைத்தும் பெரும் வரவேற்பைப் பெற்றன. குறிப்பாக இப்படத்தில் இடம்பெற்ற ரஞ்சிதமே பாடல் படம் வெளியாவதற்கு முன்பிருந்தே நல்ல வரவேற்பைப் பெற்று வருகிறது.
பட்டையை கிளப்பிய ரஞ்சிதமே:
வாரிசு’ திரைப்படத்தின் முதல் சிங்கிளாக வெளியான இந்தப் பாடலை விஜய் மானசி இணைந்து பாடியிருந்தனர். இந்தப் பாடல் கடந்த நவம்பர் மாதம் வெளியாகி பட்டி தொட்டியெல்லாம் ஹிட் அடித்தது. இன்ஸ்டாகிராம் ரீல்ஸ் தொடங்கி உலகம் முழுவதுமுள்ள விஜய் ரசிகர்களை கொண்டாட்டத்தில் ஆழ்த்திய இந்தப் பாடல் யூடியூபிலும் பார்வையாளர்களை அள்ளி மெகா ஹிட் அடித்தது.
முன்னதாக யூடியூபிலும் 100 மில்லியன் பார்வையாளர்களைக் கடந்து ரஞ்சிதமே பாடல் சாதனை படைத்துள்ளது. மற்றொருபுறம் திரையரங்குகளில் இப்பாடலின் வீடியோவும் குறிப்பாக விஜய்யின் சிங்கிள் டேக் நடனமும் கொண்டாடித் தீர்க்கப்பட்டு வரும் நிலையில், பாடலின் வீடியோவை யூ டியூப் தளத்தில் விடாமல் படக்குழுவினர் பொறுமை காத்து வருகின்றனர்.
வைரலாகும் மேக்கிங்:
இந்நிலையில், இந்தப் பாடலின் மேக்கிங் வீடியோ ஒன்று வெளியாகி சமூக வலைதளங்களில் வைரலாகி விஜய் ரசிகர்களை உற்சாகப்படுத்தி வருகிறது.
நேற்று இணையத்தில் வெளியான இந்த வீடியோவில் கொரியோகிராஃபர் ஜானி, ராஷ்மிகாவுடன் இணைந்து ரிகர்சலில் ஈடுபடும் விஜய், ரிகர்சலின்போதும் கூட சிங்கிள் டேக்கில் அலட்டிக் கொள்ளாமல் அசால்ட்டாக ஆடி அசத்தியுள்ளார்.
ஒரு புறம் தளபதி 67 படத்துக்கான பூஜை தொடங்கி படக்குழு அறிவிப்பு வரை விஜய்யின் அடுத்த படத்துக்கான அப்டேட்கள் குவிந்து வரும் நிலையில், ரஞ்சிதமே பாடலின் இந்த மேக்கிங் வீடியோ கவனமீர்த்து லைக்ஸ் அள்ளி வருகிறது.