இந்திய திரையுலகின் சூப்பர்ஸ்டாராக திகழ்பவர் நடிகர் ரஜினிகாந்த். சுமார் 125 படங்களுக்கும் மேல் கதாநாயகனாக நடித்து தனக்கென கோடிக்கணக்கான ரசிகர்களை உருவாக்கிக் கொண்டவர். ரஜினிகாந்தின் கருத்துக்கள் எப்போதும் பரபரப்பை தமிழ்நாட்டில் உருவாக்குவது வழக்கம். சமீபத்தில் தவெக-வின் முக்கிய நிர்வாகி ஆதவ் அர்ஜுனா அவரைப் பற்றி கூறிய கருத்துக்கு ரஜினிகாந்த் பதில் தெரிவித்து இருந்தது பெரிய பரபரப்பை ஏற்படுத்தியது.
ரஜினி - மனோரமா இடையே சண்டையா?
இந்த நிலையில், ரஜினிகாந்திற்கும், தமிழ் திரையுலகின் பழம்பெரும் நடிகையாக உலா வந்த மறைந்த நடிகை மனோராமாவிற்கும் இடையே மோதல் இருந்த தகவல் தற்போது வெளியாகியுள்ளது. அதாவது, நடிகர் ரஜினிகாந்த் தொடக்க காலம் முதலே கருணாநிதியுடன் நல்ல நட்புறவில் இருந்து வந்தார். அவருக்கும் ஜெயலலிதாவிற்கும் இடையே தொடக்க காலத்தில் மனக்கசப்பு இருந்து வந்தது. பின்னர், ரஜினிகாந்த் 1996 சட்டமன்ற தேர்தலில் ஜெயலலிதாவிற்கு எதிராக அளித்த பேட்டி மொத்த தமிழ்நாட்டையே பரபரப்பாக்கியது.
பழம்பெரும் நடிகையான மனோரமா எம்ஜிஆர் மற்றும் ஜெயலலிதா ஆகிய இருவருடனும் நெருக்கமான உறவு கொண்டவர். ஜெயலலிதாவுடன் பல படங்களில் அவருக்கு தோழியாக நடித்த மனோரமா அதிமுக அபிமானியாகவும் இருந்தார்.
நடந்தது என்ன?
1996ம் ஆண்டு சட்டமன்ற தேர்தலில் அதிமுக-விற்கு ஜெயலலிதா மீண்டும் ஆட்சியை கைப்பற்றினால் தமிழ்நாட்டை யாராலும் காப்பாற்ற முடியாது என்று ரஜினிகாந்த் பேசியிருப்பார். அப்போது, அதிமுக-விற்கு ஆதரவாக தேர்தல் பரப்புரையில் மனோரமா ஈடுபட்டார். அப்போது, தேர்தல் பரப்புரை மேடையில் நடிகர் ரஜினிகாந்தை நடிகை மனோரமா மிகவும் காரசாரமாக விமர்சித்திருப்பார். சூப்பர்ஸ்டாராக உலா வந்தவரை பழம்பெரும் நடிகை விமர்சித்தது அப்போது பெரும் பேசுபொருளாக மக்கள் மத்தியில் பார்க்கப்பட்டது. இந்த தகவலை பிரபல நடிகரும், இயக்குனருமான சித்ரா லட்சுமணன் தனது யூ டியூப் தொலைக்காட்சியில் தெரிவித்திருப்பார்.
சமரசம் ஆனார்களா?
பின்னர், இருவருக்கும் இடையேயான கருத்து வேறுபாட்டை மறந்து இருவரும் அருணாச்சலம் படத்தில் அடுத்தாண்டு இணைந்து நடித்தனர். தர்ம யுத்தம், அடுத்த வாரிசு, பில்லா, குரு சிஷ்யன், எஜமான், அண்ணாமலை என ஏராளமான படங்களில் அவருடன் இணைந்து இருவரும் இணைந்து நடித்துள்ளனர். அதேசமயம், அருணாச்சலம் படத்திற்கு பிறகு ரஜினிகாந்த் - மனோரமா இருவரும் இணைந்து நடிக்கவில்லை.
அதிமுக அபிமானியாகவும், ஆதரவாளராகவும் இருந்தாலும் மனோரமா கருணாநிதியுடனும் நல்ல நட்புறவில் இருந்தார். பின்னர், கருணாநிதி சிறப்பு விருந்தினராக பங்கேற்ற மேடையில் மனோரமா, ரஜினிகாந்த் ஒரே மேடையில் பங்கேற்றார். மனோரமா தமிழ் சினிமாவின் நட்சத்திரங்களான எம்ஜிஆர், சிவாஜி, ரஜினிகாந்த், கமல்ஹாசன், விஜயகாந்த், சத்யராஜ், சரத்குமார், பிரபு, விஜய், அஜித் என அனைத்து பிரபலங்களுடனும் நடித்துள்ளனர்.