நடிகர் மாதவனின் நடிப்பு மற்றும் இயக்கத்தில் உருவாகியுள்ள ராக்கெட்ரி : தி நம்பி எஃபக்ட் திரைப்படம் நாளை வெளியாகவுள்ள நிலையில் அவர் மனைவியுடன் எடுத்துக்கொண்ட புகைப்படம் ஒன்று தற்போது வைரலாகி வருகிறது.
நம்பி நாராயணன் வாழ்க்கையை படமாக்கும் மாதவன் :
மாதவன் தற்போது இஸ்ரோவின் முன்னாள் விஞ்ஞானியும் விண்வெளிப் பொறியாளருமான நம்பி நாராயணன் வாழ்க்கையை படமாக்கியுள்ளார். படத்திற்கு ராக்கெட்ரி : தி நம்பி எஃபக்ட் என பெயர் வைக்கப்பட்டுள்ளது. இந்த படத்தில் நம்பி நாராயணாக நடிப்பதோடு மட்டுமல்லாமல் கதை , திரைக்கதை , இயக்கம் என அனைத்தையும் மாதவனே செய்திருக்கிறார். மாதவனுக்கு ஜோடியாக நடிகை சிம்ரன் நடித்துள்ளார். படத்தின் தமிழ் பதிப்பில் நடிகர் சூர்யாவும் இந்தி பதிப்பில் நடிகர் ஷாருக்கானும் சிறப்பு தோற்றத்தில் நடித்துள்ளனர். இதற்காக அவர்கள் ஒரு ரூபாய் கூட சம்பளம் வாங்கவில்லை என்பதையும் மாதவன் தனது புரமோஷன் நிகழ்ச்சியில் பகிர்ந்திருந்தார்.
நம்பி நாராயணன் கெட்டப்பில் ரொமான்ஸ் :
தற்போது மாதவன் சமூக வலைத்தளங்களில் புகைப்படம் ஒன்றை பகிர்ந்திருக்கிறார். அதில் தனது மனைவி சரிதாவை மாதவன் அணைத்தபடி ஒருவர் முகத்தை ஒருவர் பார்த்த மாதிரியாக படு ரொமாண்டிக்காக இருக்கிறது அந்த புகைப்படம் . அதில் மாதவனின் கெட்டப்தான் ஹைலைட் . ஏனென்றால் படத்தில் நம்பி நாராயணன் கெட்டப்பில் நடிக்கும் மாதாவன், அந்த லுக்கிற்காக ஹேர் கலரிங் செய்து தனது தோற்றத்தை மாற்றியுள்ளார். அந்த கெட்டப்பில் தனது மனைவியுடன் செல்ஃபி எடுத்து இணையத்தில் பதிவிட்டுள்ளார். முன்னதாக அதனை தனது மனைவியின் சகோதரானுக்கு அனுப்பியுள்ளார். அதை கண்ட அவர் , மாதவன் என அறியாமல் திடீரென கோவப்பட்டிருக்கிறார். இதைத்தான் அந்த புகைப்படத்திற்கு மாதவன் கேப்ஷனாக வைத்து நக்கலடித்துள்ளார்.
வீடியோ :
முன்னதாக மாதவன் ஹேர் கலர் செய்யும் பொழுது தனது மனைவிக்காக வீடியோ ஒன்றை மாதவன் பதிவு செய்திருந்தார் . அதில் “ ஹாய் சரிதா நான் வயசானப்பிறகு இப்படித்தான் இருப்பேன் ..இதை உனக்கு காட்டுவதற்காகத்தான் இந்த வீடியோ . save பண்ணி வச்சுக்கோ” என தெரிவித்திருந்தார்.