ப்ரீத்தி ஜிந்தா
மணிரத்னம் இயக்கிய உயிரே படத்தின் மூலம் தமிழ் ரசிகர்களிடையே கவனமீர்த்தவர் நடிகை ப்ரீத்தி ஜிந்தா. இவர் சிரிக்கும்போது கன்னத்தில் விழும் குழிக்காகவே ஒரு பெரிய ரசிகர் பட்டாளம் இருக்கிறது. தமிழில் தொடர்ச்சியாக நடிக்கவில்லை என்றாலும் இன்றும் தமிழ் ரசிகர்களிம் மனதில் நீங்காத இடம்பிடித்துள்ளார். குறிப்பாக உயிரே படத்தில் வரும் நெஞ்சினிலே பாடல் ப்ரீத்தி ஜிந்தாவுக்கு இன்று வரை அடையாளமாக இருக்கிறது.
தனது 49 வயதிலும் அழகு குறையாமல் இளமையாக இருக்கும் ப்ரீத்தி ஜிந்தா தற்போது ஐ.பி.எல் இல் பஞ்சாப் அணிக்கு உரிமையாளராக இருக்கிறார். பஞ்சாப் அணியின் மேட்ச் என்றால் மைதானத்தில் இருக்கும் எல்லா கேமராக்களும் ப்ரீத்தி ஜிந்தா பக்கம்தான்.
ஷாருக்கானுடன் ஒத்திகை
தனது சமூக வலைதள பக்கத்தில் தொடர்ச்சியாக பழைய நினைவுகளை பகிர்ந்து வருபவர் ப்ரீத்தி ஜிந்தா. அந்த வகையில் தற்போது ஷாருக்கான் உடன் நடனமாடும் வீடியோ ஒன்றை தனது கேலரியில் இருந்து வெளியிட்டுள்ளார். நெஞ்சினிலே பாடலில் தானும் ஷாருக்கான் இணைந்து ஆடிய டான்ஸ் மூவ்ஸை விருது நிகழ்ச்சி ஒன்றுக்காக பயிற்சி எடுத்துக்கொண்டபோது இந்த வீடியோ எடுக்கப்பட்டதாக அவர் கூறியுள்ளார்.
"ஒரு விருது நிகழ்ச்சியில் ஆடுவதற்காக நாங்கள் பயிற்சி எடுத்துக்கொண்டிருந்தபோது இந்த வீடியோ எடுக்கப்பட்டது. இரண்டு நாட்கள் தூக்கமில்லாமல் ஒரு ஜாம்பீ மாதிரி நான் இருந்தேன். அந்த நாளை காப்பாற்றியவர் ஷாருக்கான்தான். அவ்வப்பொழுது அவருக்கே உரிய தனித்துவமான ஜோக் அடித்து என்னை உற்சாகப்படுத்தினார். இந்த வீடியோவில் நாங்கள் பயிற்சி செய்யும் இந்த ஸ்டெப் நெஞ்சினிலே பாடலில் நாங்கள் ஆடியது." என்று ப்ரீத்தி ஜிந்தா பதிவிட்டுள்ளார்.
ஷாருக் கான் மற்றும் ப்ரீத்தி ஜிந்தா தில் சே, வீர் ஜாரா , கல் ஹோ நா ஹோ , கபி அல்விதா நா கெஹனா உள்ளிட்டப் படங்களில் இணைந்து நடித்துள்ளார்கள். 2008 ஆம் ஆண்டு ஷாருக்கான் நடித்த ரப் நே பனாதி ஜோடி படத்தில் ப்ரீத்தி ஜிந்தா சிறப்பு தோற்றத்தில் நடித்துவிட்டுச் சென்றார். இருவரும் இணைந்து திரையில் தோன்றியது அதுவே கடைசி. இனி வரும் காலங்களில் இருவரும் இணைந்து நடித்து ரசிகர்களுக்கு நாஸ்டாலஜியான ஒரு உணர்வை தருவார்களா என்பதற்கு காலம்தான் பதில்.