டிராகன்
அஸ்வத் மாரிமுத்து இயக்கத்தில் பிரதீப் ரங்கநாதன் நடித்துள்ள டிராகன் திரைப்படம் கடந்த பிப்ரவரி 21 ஆம் தேதி வெளியாகியது. அனுபவமா பரமேஸ்வரன் , காயடு லோஹர் , மரியம் ஜார்ஜ் , விஜே சித்து , மிஸ்கின் உள்ளிட்ட பலர் இப்படத்தில் நடித்துள்ளார்கள். லியோ ஜேம்ஸ் இசையமைத்துள்ளார். ஏ.ஜி.எஸ் என்டர்டெயின்மெண்ட் இப்படத்தை தயாரித்துள்ளது
டிராகன் பட வசூல்
கோமாளி, லவ் டுடே ஆகிய இரு படங்களை இயக்கிய பிரதீப் ரங்கநாதன் அடுத்தடுத்து கமர்சியல் வெற்றிகளை கொடுத்தார். இயக்குநராக மட்டுமில்லாமல் நடிகராகவும் இரண்டே படங்களில் பல இளம் நடிகர்களுக்கு சவால் விடுகிறார் பிரதீப். சுமார் ரூ 37 கோடி பட்ஜெட்டில் உருவான டிராகன் திரைப்படம் 3 நாட்களில் 50 கோடி வசூலித்துள்ளது. இன்னும் ஒரே வாரத்தில் படம் 100 கோடி வசூலை எட்டும் என்று எதிர்பார்க்கப்படுகிறது. இத்தகவலை படத்தின் தயாரிப்பு நிறுனம் அதிகாரப்பூர்வமாக வெளியிட்டுள்ளது
அதன்படி தமிழ் நாட்டில் டிராகன் படம் 3 நாளில் 24.9 கோடியும் , ஆந்திரா மற்றும் தெல்ங்கானாவில் ரூ 6.25 கோடியும் கேரளா, கர்னாடகா மற்றும் வட மாநிலங்களில் 6.25 கோடியும் வசூலித்துள்ளது. வெளிநாடுகளில் இப்படம்14.7 கோடி வசூலித்துள்ளது.
கோலிவுட்டின் அடுத்த ஸ்டார்
தமிழ் சினிமாவில் தற்போது பல வளர்ந்து வரும் நடிகர்கள் உள்ளார்கள். ஹரிஷ் கல்யாண் , கவின் , மணிகண்டன் என இளம் நடிகர்கள் மக்களிடம் நல்ல வரவேற்பைப் பெற்று வருகிறார். ஆனால் இந்த நடிகர்கள் பல வருடங்கள் சினிமாவில் இருந்து கவனமாக கதைகளை தேர்வு செய்து நடித்தும் இவர்களின் படங்களுக்கு மிக மெதுவாக தான் ரசிகர் கவனம் கிடைக்கிறது. ஆனால் இரண்டே படங்களில் பிரதீப் ரங்கநாதன் இளைஞர்களிடம் பெற்றிருக்கும் ஆதரவு அனைவரையும் ஆச்சரியப்படுத்தியுள்ளது. குறிப்பாக இதுவரை அவர் நடித்த படங்களும் சரி இயக்கிய படங்களும் சரி வசூல் ரீதியாக மிகப்பெரிய வெற்றி அடைகின்றன. கோலிவுட்டில் அடுத்த ஸ்டார் பிரதீப் என்றும் பலர் பேசத் தொடங்கிவிட்டார்கள்.