இன்றைய சினிமாவில் இளம் இயக்குநர்களாக வளர்ந்து வரும் இயக்குனர்கள் பலரும் நல்ல திரைக்கதையின் மூலம் ரசிகர்களின் கவனத்தை பெற்று வருகிறார்கள். அந்த பட்டியலில் முதலிடம் பிடித்துள்ளார் இயக்குனர் பிரதீப் ரங்கநாதன். ஜெயம் ரவி, காஜல் அகர்வால், யோகி பாபு, கே.எஸ். ரவிக்குமார் உள்ளிட்டோரின் நடிப்பில் 2019ம் ஆண்டு வெளியான 'கோமாளி' திரைப்படம் மாபெரும் வரவேற்பை பெற்று சூப்பர் ஹிட் படமாக வசூலை குவித்தது. முதல் படத்திலேயே அனைவரின் கவனத்தையும் தன் பக்கம் ஈர்த்தவர் இயக்குனர் பிரதீப் ரங்கநாதன்.
அந்த வகையில் அடுத்ததாக அவர் இயக்கி நடித்த 'லவ் டுடே' திரைப்படமும் பெரிய அளவில் வெற்றி பெற்றது. 100 நாட்களை கடந்து திரையரங்குகளில் வெற்றிகரமாக ஓடியது லவ் டுடே திரைப்படம். இன்றைய காலகட்டத்திற்கு ஏற்ற ஒரு கதையை கொண்டு வந்து கலக்கியவர் பிரதீப் ரங்கநாதன். இயக்கத்தில் மட்டுமின்றி நடிப்பிலும் பிச்சு உதறியவருக்கு அதற்கு பிறகு வாய்ப்புகள் அனைத்து திசையில் இருந்தும் குவிந்து வருகிறது.
அடுத்த இயக்குனர் யார் ?
தற்போது பிரதீப் ரங்கநாதன் அடுத்ததாக எந்த இயக்குனரின் படத்தில் நடிக்க உள்ளார் என்ற எதிர்பார்ப்பு மக்கள் மத்தியில் எழுந்துள்ளது. அப்படி இருக்கையில் அவர் அடுத்தாக தமிழ் சினிமாவின் முன்னணி இயக்குனரான விக்னேஷ் சிவன் இயக்கத்தில் நடிக்க உள்ளார் என்ற வதந்திகள் பரவின. அதை உறுதிப்படுத்தும் வகையில் விருது வழங்கும் விழா ஒன்றில் விக்னேஷ் சிவன் - நயன்தாராவுடன் வந்திறங்கிய பிரதீப் ரங்கநாதனை பார்த்ததும் வதந்தி உறுதி செய்யப்பட்டது.
மேலும் அவர் நயன்தாராவின் அருகில் நிகழ்ச்சியின் போது அமர்ந்து இருந்த புகைப்படங்களை சோசியல் மீடியாவில் வெளியாகி அடுத்த படம் குறித்த அப்டேட்டை கன்ஃபார்ம் செய்தது. இப்படத்தினை நயன்தாரா - விக்னேஷ் சிவன் சொந்த தயாரிப்பு நிறுவனமான ரவுடி பிக்சர்ஸ் நிறுவனம் தயாரிக்க உள்ளதாக கூறப்படுகிறது. இது குறித்த அதிகாரப்பூர்வமான தகவல் வெளியாகவில்லை என்றாலும் விக்னேஷ் சிவன் இயக்கத்தில் பிரதீப் ரங்கநாதன் இணையப் போகிறார் என்கிறது நெருங்கிய சினிமா வட்டாரம்.
அசத்தும் பிரதீப் ரங்கநாதன்:
மேலும் இயக்குனர் மிதுன் இயக்கத்திலும் பிரதீப் ரங்கநாதன் நடிக்க போவதாகும் ஒரு சில தகவல்கள் கூறுகின்றன. ஒரு இயக்குனராக மட்டுமின்றி நடிகராகவும் மக்களின் மனங்களை வென்றுவிட்டார் பிரதீப் ரங்கநாதன்.