பத்து தல படத்தின் டீசர் அப்டேட் வெளியாகி சிம்பு ரசிகர்களை உற்சாகப்படுத்தி வருகிறது.
பத்து தல:
தமிழ் சினிமாவின் முன்னணி நடிகர்களுள் ஒருவரான சிலம்பரசன் அடுத்தடுத்து படங்களில் நடித்து வருகிறார். அந்த வகையில், மாநாடு, வெந்து தணிந்தது காடு ஆகிய படங்களைத் தொடர்ந்து அடுத்ததாக சிம்பு நடிப்பில் ’பத்து தல’ படம் விரைவில் ரிலீசாகவுள்ளது. ஏஜிஆர் எனும் கதாபாத்திரத்தில் பத்து தல படத்தில் சிம்பு நடிக்கும் நிலையில், ஸ்டுடியோ கிரீன் நிறுவனம் இந்தப் படத்தை தயாரித்துள்ளது.
மார்ச் 30 ரிலீஸ்:
சில்லுனு ஒரு காதல், நெடுஞ்சாலை படங்களை இயக்கிய கிருஷ்ணா இப்படத்தை இயக்கியுள்ள நிலையில், ஏ.ஆர்.ரஹ்மான் இந்தப் படத்துக்கு இசையமைத்துள்ளார். 2017ஆம் ஆண்டு கன்னட சினிமாவில் ஹிட் அடித்த மஃப்டி படத்தின் ரீமேக்காக உருவாகியுள்ள பத்து தல படத்தில் பிரியா பவானி சங்கர், கௌதம் கார்த்திக், கலையரசன் ஆகியோர் முக்கியக் கதாபாத்திரங்களில் நடித்துள்ளனர்.
முன்னதாக பத்து தல படம் கடந்த டிசம்பர் 14 அன்று வெளியாகும் என அறிவிக்கப்பட்டு பின்னர் தள்ளிப்போனது. தொடர்ந்து படத்தின் ரிலீஸ் தேதி மார்ச் 30 என அறிவிக்கப்பட்டதுடன், சிம்புவின் பிறந்த நாள் பிப்ரவரி 3 ஆம் தேதி அன்று, பத்து தல படத்தின் முதல் பாடலாக ’நம்ம சத்தம்’ பாடல் வெளியாகி வரவேற்பைப் பெற்றது.
மிரட்டப்போகும் டீசர்:
நள்ளிரவு 12.06 மணிக்கு வெளியான இந்த பாடலை இசையமைப்பாளர் ஏ.ஆர்.ரஹ்மான் பாடியிருந்தார். பாடலாசிரியர் விவேக் வரிகளை எழுயிருந்த நிலையில், இப்பாடல் ரசிகர்களிடம் மிகுந்த வரவேற்பை பெற்றது. அதேபோல் முன்னதாக இந்தப் படத்தின் கதாபாத்திரங்களின் புகைப்படங்கள் இணையத்தில் வெளியாகி சமூக வலைதளங்களில் பெரும் ஹிட் அடித்தன. இது குறித்து “என்ன ரத்தங்களா ஹேப்பியா, நீங்க இல்லாம நான் இல்ல” எனப் பதிவிட்டு சிம்பு தன் ரசிகர்களை உற்சாகத்தில் ஆழ்த்தினார்.
வரும் மார்ச் 18ஆம் தேதி இப்படத்தின் இசை வெளியீட்டு விழா பிரம்மாண்டமான முறையில் நேரு உள் விளையாட்டு அரங்கில் நடைபெற உள்ளதாக முன்னதாகத் தகவல் வெளியானது. ஆனால் படத்தின் இசை, ட்ரெய்லர் வெளியீடு குறித்து இதுவரை எந்தவித அதிகாரப்பூர்வ அறிவிப்பும் வெளியாகவில்லை.
இதனால் சிம்பு ரசிகர்கள் பெரும் அதிருப்தியில் ஆழ்ந்திருந்தனர். இந்நிலையில், அவர்களை மகிழ்விக்கும் வகையில் நாளை பத்து தல படத்தின் டீசர் வெளியாகும் என ஸ்டுடியோ க்ரீன் நிறுவனம் அறிவிப்பு வெளியிட்டுள்ளது.
பாயின் சம்பவம்:
மேலும் இது குறித்து பதிவிட்டுள்ள நடிகர் சிம்பு, ”இப்போது தான் டீசர் பாத்தேன். பாயின் சம்பவத்துக்கு அனைவரும் தயாராகுங்கள்... இவ்வளவு தான் சொல்ல முடியும்” என ஏ.ஆர்.ரஹ்மானைக் குறிப்பிட்டு உற்சாகமாகப் பதிவிட்டுள்ளார்.
சிம்புவின் இந்த ட்வீட் அவரது ரசிகர்களை உற்சாகக் கொண்டாட்டத்தில் ஆழ்த்தியுள்ளது.