தங்கலான்
பா ரஞ்சித் இயக்கத்தில் விக்ரம் நடித்துள்ள படம் தங்கலான். இப்படத்தில் · பார்வதி திருவொத்து, மாளவிகா மோகனன்,பசுபதி டேனியல் கால்டாகிரோன், ஹரி கிருஷ்ணன், ப்ரீத்தி கரன் , வேட்டை முத்துக்குமார் உள்ளிட்டவர்கள் நடித்துள்ளார்கள்.
ஜி.வி பிரகாஷ் குமார் இசையமைத்துள்ளார். ஸ்டுடியோ கிரீன் நிறுவனம் இப்படத்தை தயாரித்துள்ளது. தங்கலான் படத்தின் டிரைலர் சமீபத்தில் வெளியாகி கவனமீர்த்துள்ள நிலையில் தற்போது படத்தின் ரிலீஸ் தேதி வெளியாகியுள்ளது. தங்கலான் படம் வரும் ஆகஸ்ட் 15 சுதந்திர தினத்தை முன்னிட்டு திரையரங்குகளில் வெளியாக இருப்பதாக படக்குழு அதிகாரப்பூர்வ தகவல் வெளியிட்டுள்ளது.
தங்கலான் உருவான விதமும் எதிர்பார்ப்பும்
விக்ரமின் 61 ஆவது படமாக உருவாகி இருக்கும் தங்கலான் படம் கடந்த 2021-ஆம் ஆண்டு அறிவிக்கப் பட்டது. தொடர்ந்து 2022 ஆம் ஆண்டு அக்டோபர் மாதம் படப்பிடிப்பு துவங்கி சென்னை , ஹைதராபாத் , மதுரை மற்றும் கர்னாடகா உள்ளிட்ட இடங்களில் படப்பிடிப்பு நடைபெற்றது. எழுத்தாளர்கள் தமிழ் பிரபா மற்றும் அழகிய பெரியவன் இருவரும் படத்தின் திரைக்கதையில் பணியாற்றியுள்ளார்கள். நீண்ட காத்திருப்பிற்கு பிறகு தங்கலான் படத்தின் டிரைலர் சமீபத்தில் வெளியானது.
கோலார் தங்க வயலில் வாழ்ந்த பழங்குடி மக்கள் தங்கள் நிலத்திற்காக ஆங்கிலேயர்களை எதிர்த்து போராட்டத்தை மையமாக வைத்து உருவாகியிருக்கிறது தங்கலான். தங்கள் இனத்தின் முன்னேற்றத்திற்காக முதல் ஆங்கிலேயர்களுக்கு உதவி செய்த தங்கலான் எப்படி தன் நிலத்திற்காக ஆங்கிலேயர்களை எதிர்த்து போராடுகிறார் என்பது தங்கலான் படத்தின் ஒன்லைனாக இருக்கலாம் என்று எதிர்பார்க்கப் படுகிறது.
பா ரஞ்சித் இயக்கத்தில் முன்பாக வெளியான சார்பட்டா பரம்பரை திரைப்படம் மிகப்பெரிய வெற்றி படமாக அமைந்தது. ஆனால் இப்படம் நேரடியாக திரையரங்கில் வெளியான காரணத்தினால் இப்படத்தை திரையரங்கில் கொண்டாடும் வாய்ப்பு இல்லாமல் போனது. இதற்கு அடுத்து ரஞ்சித் இயக்கிய நட்சத்திரம் நகர்கிறது திரைப்படம் மாறுபட்ட கதையம்சம் கொண்ட படமாக இருந்ததால் கலவையான விமர்சனங்களைப் பெற்றது. தற்போது நீண்ட காத்திருப்பிற்கு பிறகு பிரம்மாண்டமாக உருவாகியுள்ள தங்கலான் படம் தமிழ் சினிமாவில் மட்டுமில்லாமல் இந்திய சினிமாவில் மிகப்பெரிய தாக்கத்தை ஏற்படுத்தும் என்று எதிர்பார்க்கப் படுகிறது.