நானும் ரவுடிதான் படத்தில் துவங்கி நீண்ட ஆண்டுகளாக காதலித்து வந்த தமிழ் சினிமாவின் லேடி சூப்பர் ஸ்டார் நயன்தாரா - விக்னேஷ் சிவன் ஜோடி, கடந்த ஜூன் 9 ஆம் தேதி சென்னையில் திருமணம் செய்து கொண்டனர். மகாபலிபுரத்தில் அமைந்திருக்கும் ரிசார்ட்டில் அமைக்கப்பட்ட கண்ணாடி மண்டபத்தில் நயன்தாராவை கரம் பிடித்தார் விக்னேஷ் சிவன். திருமணம் நடந்த இடத்தில் பலத்த பாதுகாப்பு ஏற்பாடுகள் செய்யப்பட்டிருந்தன. இந்த திருமணத்தை ஒளிபரப்பு செய்யும் உரிமத்தை நெட்ஃபிளிக்ஸ் பெற்றுள்ளதாக செய்திகள் தெரிவித்தன. அதனால் எந்த மீடியாவுக்கும் உள்ளே அனுமதி இல்லை என்பதெல்லாம் நாம் திருமணம் நடந்த அன்றே அறிந்த விஷயம்.
பிரமாண்ட திருமணம்
திருமணத்திற்கு வந்தவர்கள் தங்க 5 ஸ்டார் ஹோட்டலின் அனைத்து அறைகளையும் புக் செய்திருந்தார் நயன்தாரா. இந்த திருமணத்தில் 200 விஜபிக்களுக்கு அழைப்பு விடுக்கப்பட்டதாக தகவல்கள் வெளியாகி இருந்தது. அதேபோல திருமண விருந்தில் பரிமாறப்பட்ட உணவு மெனு, விருந்தினர்களுக்கு சிறப்புப் பரிசு, தங்குவதற்கு அறை, கண்ணாடி மாளிகையில் திருமணம் என நயன்தாரா - விக்னேஷ் சிவன் திருமணத்திற்கு கோடி கணக்கில் செலவழிக்கப்பட்டதாகவும் இணையத்தில் தகவல்கள் வந்தன.
நெட்ப்ளிக்ஸ் உடன் கருத்துவேறுபாடா
நயன்தாரா தன் திருமண வீடியோவை நெட்ஃப்ளிக்ஸ் நிறுவனத்திற்கு ரூ. 25 கோடிக்கு விற்பனை செய்துவிட்டார் என்றும், திருமண செலவையும் நெட்ஃப்ளிக்ஸ் நிறுவனம் தான் ஏற்றுக் கொண்டது என்றும், மும்பையில் இருந்து வந்த மேக்கப் கலைஞர்கள், பவுன்சர்கள் என்று சகலமும் நெட்ஃப்ளிக்ஸ் பாக்கெட்டில் இருந்து தான் செலவு என்றெல்லாம் தகவல்கள் வந்தன. இதற்கிடையே ஒரு பிரச்சனையும் வந்தது. விக்னேஷ் சிவன் விதிகளை மீறிவிட்டதாகவும், நெட்ஃப்ளிக்ஸ் அனுமதி இன்றி போட்டோக்களை வெளியிட்டதாகவும் வதந்திகள் பரவின.
வதந்திக்கு முற்றுப்புள்ளி
ஆனால் இந்த வதந்திகளுக்கு முற்றுப்புள்ளி வைக்கும்படி, நெட்ப்ளிக்ஸ் நிறுவனம் அறிவிப்பை வெளியிட்டு உள்ளது. நயன்தாரா விக்னேஷ் சிவன் குறித்த ஆவணப்படம் கூடிய விரைவில் நெட் ஃப்ளிக்ஸ் தளத்தில் ஒளிப்பரப்பாகவுள்ளதாக அந்த தகவல்கள் தெரிவிக்கின்றன. நயன்தாரா - விக்னேஷ் சிவன் காதல் கதை என பெயர் வைக்கப்பட்டுள்ள இந்த ஆவணப்படத்தை விரைவில் நெட் ஃப்ளிக்ஸில் ஒளிப்பரப்ப ஏற்பாடுகள் வேகமாக நடந்து வருகிறதாம். கூடிய விரைவில் ரசிகர்கள் இதை கண்டுக்களிக்கலாம் எனவும் கூறப்பட்டுள்ளது. இதில் நயன்தாராவின் வாழ்க்கை வரலாறும் இடம்பெறும் என்று கூறப்படுகிறது.
விரைவில் வெளியாகும் ஆவணப்படம்
ஏற்கெனவே அறிவித்ததுப்படி திருமண போட்டோக்களை திருமணம் முடிந்து பிற்பகலுக்கு பிறகு சோஷியல் மீடியாவில் விக்னேஷ் சிவன் ஷேர் செய்து இருந்தார். அதனால் எந்த பிரச்சனையும் இல்லை என்று வதந்திகளுக்கு முற்றுப்புள்ளி வைக்கவே இந்த அப்டேட்டை நெட்ப்ளிக்ஸ் நிறுவனம் வெளியிட்டு இருப்பதாக தகவல்கள் வெளிவந்துள்ளன. அதே போல் விக்கி - நயனின் காதல் கதையை இயக்குனர் கெளதம் மேனன் ஆவணப்படமாக இயக்கியுள்ளார் எனவும் தெரிவிக்கப்பட்டது. இது எப்போது எப்படி வெளியாகும் என்பதை விரைவில் நெட்ப்ளிக்ஸ் நிறுவனம் அறிவிக்கும் என்று தெரிவிக்கப்பட்டுள்ளது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்