தமிழ் திரையுலகின் முக்கிய கதாநாயகியாக வலம் வரும் நயன்தாரா, கடந்த ஜூன் 9ம் தேதி இயக்குநர் விக்னேஷ் சிவனை முக்கிய திரை பிரபலங்கள் சூழ மாமல்லபுரம் அருகே உள்ள ஒரு தனியார் சொகுசு ஹோட்டலில் திருமணம் செய்து கொண்டார். அடுத்த 4 மாதத்தில் நடிகை நயன்தாரா வாடகைத் தாய் முறைப்படி, இரு ஆண் குழந்தைகளை பெற்றெடுத்து அம்மாவானார்.
தொடர்ந்து, நயன்தாரா மற்றும் விக்னேஷ் சிவன் சேர்ந்து, அந்த குழந்தைகளுக்கு உயிர் மற்றும் உலகம் என பெயர் சூட்டியுள்ளனர். திருமணத்திற்கு முன்பு வரை கிறிஸ்துமஸ் மற்றும் புத்தாண்டு போன்ற நாட்களில், விக்னேஷ் சிவனுடன் வெளிநாடுகளில் சுற்றுப்பயணம் மேற்கொண்டு வந்தார் நயன்தாரா. அதுதொடர்பான புகைப்படங்கள் அவ்வப்போது இணையத்தில் வெளியாகி கவனம் ஈர்த்து வந்தன.
விக்னேஷ் சிவன் வாழ்த்து:
ஆனால், இம்முறை தனது கணவர் மற்றும் இரட்டை குழந்தைகளுடன் சேர்ந்து நயன்தாரா கிறிஸ்துமஸ் பண்டிகையை கொண்டாடி உள்ளார். நால்வரும் சேர்து குடும்பமாக எடுத்துக் கொண்ட புகைப்படத்தை இயக்குநர் விக்னேஷ் சிவன் தனது இன்ஸ்டாகிராம் பக்கத்தில் வெளியிட்டு ரசிகர்களுக்கு கிறிஸ்துமஸ் வாழ்த்துகளை தெரிவித்துள்ளார்.
விக்னேஷ் சிவன் இன்ஸ்டா பதிவு:
அந்த பதிவில், உயிர், உலகம், நயன், விக்கி மற்றும் குடும்பத்தினர் சார்பாக அனைவருக்கும், கிறிஸ்துமஸ் மற்றும் புத்தாண்டு நல்வாழ்த்துகள். அனைவருக்கும் அனைத்து சந்தோஷங்களுடன், பெருங்கனவுகளையும் கடவுள் நிறைவேற்றி கொடுக்கட்டும் என இறைவனை பிரார்த்திப்பதாகவும் விக்னேஷ் சிவன் தனது பதிவில் குறிப்பிட்டுள்ளார். அதில் இடம்பெற்றுள்ள புகைப்படத்தில் தனது இரண்டு குழந்தைகளின் புகைப்படத்தையும், சாண்டா கிளாசின் தொப்பி போன்ற ஸ்டிக்கரை கொண்டு விக்னேஷ் சிவன் மறைத்துள்ளார்.
பாலிவுட்டில் அறிமுகமாகும் நயன்தாரா:
நடிகை நயன்தாரா, இயக்குநர் விக்னேஷ் சிவன் மற்றும் அவர்களது குழந்தைகளுக்கு ரசிகர்கள் மற்றும் சினிமா பிரபலங்கள் பலரும் கிறிஸ்துமஸ் வாழ்த்துக்களை தெரிவித்து வருகின்றனர். சமீபத்தில் வெளியான கனெக்ட் படத்தின் ரிலீஸை முன்னிட்டு பிரத்யேக பேட்டி அளித்த நயன்தாரா தன்னுடைய வாழ்க்கை பற்றி பல்வேறு விஷயங்களை வெளிப்படையாக பேசியிருந்தார். இதுவரை தென்னிந்தியாவில் லேடி சூப்பர்ஸ்டாராக அசத்தி வந்த நிலையில், அடுத்த ஆண்டு நயன்தாரா பாலிவுட்டில் அறிமுகம் ஆக உள்ளார். அட்லி இயக்கத்தில் ஷாருக்கான் நடிப்பில் உருவாகி உள்ள ஜவான் படத்தில் நயன்தாரா நாயகியாக நடித்து வருகிறார்.