விஜய் நடிப்பில் உருவாகியுள்ள வாரிசு படத்தின் முதல் பாடல் இன்று வெளியாகவுள்ள நிலையில் இசையமைப்பாளர் எஸ்.எஸ்.தமன் ட்வீட் ஒன்றை வெளியிட்டுள்ளார்.
பீஸ்ட் படத்தை தொடர்ந்து தமிழ் சினிமாவின் முன்னணி நடிகராக உள்ள விஜய் அடுத்ததாக வாரிசு படத்தில் நடித்து வருகிறார். இயக்குனர் வம்சி பைடிபள்ளி இயக்கும் இப்படத்தில் நடிகை ராஷ்மிகா மந்தனா ஹீரோயினாக நடித்துள்ளார். அதுமட்டுமல்லாமல் பிரகாஷ்ராஜ், சரத்குமார், பிரபு, ஷாம்,சங்கீதா, ஜெயசுதா, உள்ளிட்ட மிகப்பெரிய நட்சத்திர பட்டாளமே இப்படத்தில் இணைந்துள்ளதால் வாரிசு படத்திற்கு பெரும் எதிர்பார்ப்பு நிலவுகிறது.
வாரிசு படத்தின் ஃபர்ஸ்ட் லுக் போஸ்டர்கள் கடந்த ஜூன் 21 ஆம் தேதி விஜய்யின் பிறந்தநாளை முன்னிட்டு வெளியாகி வரவேற்பை பெற்றது. அதன்பின்னர் ஷூட்டிங் ஸ்பாட்டில் எடுக்கப்பட்ட புகைப்படங்கள், வீடியோக்கள் இணையத்தில் கசிந்ததால் படத்தின் மீது நாளுக்கு நாள் எதிர்பார்ப்பு எகிறியது. 2023 ஆம் ஆண்டு பொங்கலுக்கு இப்படம் வெளியாகும் என தெரிவிக்கப்பட்டுள்ள நிலையில் இன்னும் சில 2 மாதங்களே இருப்பதால் அடுத்தடுத்து அப்டேட்டுகள் வெளியாகி ரசிகர்களை மகிழ்விக்க போவது நிச்சயம்.
அந்த வகையில் தீபாவளிக்கு வாரிசு படத்தின் முதல் பாடல் வெளியாகும் என எதிர்பார்க்கப்பட்ட நிலையில் புது போஸ்டர் வெளியாகியிருந்தது. இதனைத் தொடர்ந்து நேற்று முன்தினம் (நவம்பர் 3) வாரிசு படத்தின் முதல் பாடலான ரஞ்சிதமே பாடலின் ப்ரோமோ வெளியாகி ரசிகர்களிடையே நல்ல வரவேற்பை பெற்றது. விவேக் வரிகளில் நடிகர் விஜய் தான் இப்பாடலை பாடியுள்ளார். மேலும் ரஞ்சிதமே இன்றைய தினம் (நவம்பர் 5) ஆம் தேதி வெளியாகும் என அறிவிக்கப்பட்டுள்ள நிலையில் இசையமைப்பாளர் தமன் தனது ட்விட்டர் பக்கத்தில் பதிவு ஒன்றை வெளியிட்டுள்ளார்.
அதில் விஜய்யுடன் இருக்கும் போட்டோவை வெளியிட்டு இன்று தான் எனக்கு தீபாவளி !! பட்டாசு பாடலுடன் உங்களுடன் கொண்டாட காத்திருக்கிறேன் !! என தெரிவித்துள்ளார். இதனால் கண்டிப்பாக இப்பாடல் நினைத்ததை விட ரசிகர்களை கொண்டாட வைக்கும் என எதிர்பார்க்கப்படுகிறது.