நடிகர் கமல்ஹாசன் நடிப்பில் நான்கு ஆண்டுகளுக்கு பிறகு வெளியாகியுள்ள ’விக்ரம்’ திரைப்படம், பல தமிழ் படங்களின் பாக்ஸ் ஆஃபீஸ் சாதனைகளை அடித்து நொறுக்கி வருகிறது.
இந்தப் படத்தில் கமல்ஹாசனுடன் விஜய் சேதுபதி, பஹத்பாசில், சிறப்புத் தோற்றத்தில் சூர்யா, காயத்ரி உள்ளிட்ட பலரும் நடித்துள்ளனர்.
கடந்த 3ஆம் தேதி வெளியான இந்தப் படம், அதன் ஆக்ஷன் காட்சிகள், நட்சத்திர நடிகர்களின் நடிப்பு, இசை உள்ளிட்ட காரணங்களால் தமிழ் மட்டுமின்றி பிற மொழிகளிலும் பலத்த வரவேற்பைப் பெற்று வருகிறது. மேலும், இப்படம் இந்தியா மட்டுமின்றி வெளிநாடுகளிலும் வசூல் வேட்டை நடத்தி வருகிறது.
இதுவரை இப்படம் உலக அளவில் 250 கோடி ரூபாயை வசூலித்துள்ளதாகத் தெரிவிக்கப்படுகிறது. இந்நிலையில், சூப்பர் ஸ்டார் ரஜினிகாந்த் உள்பட பலரும் படம் பார்த்து கமல், லோகேஷ் மற்றும் படக்குழுவினரை பாராட்டி வருகின்றனர்.
அந்த வகையில் முன்னதாக இப்படத்தை கண்டுகளித்த தெலுங்கு மெகா ஸ்டார் சிரஞ்சீவி, படத்தை வெகுவாகப் பாராட்டியுள்ளார். மேலும் லோகேஷ், கமல் இருவருடனும் எடுத்துக் கொண்ட புகைப்படத்தை பகிர்ந்துள்ள சிரஞ்சீவி பகிர்ந்துள்ளார். இந்த ஃபோட்டோவில் பாலிவுட் பெரும் நடிகர் சல்மான் கானும் உள்ளார்.
விக்ரம் படத்தின் வசூல் விரைவில் 500 கோடியை எட்டும் என எதிர்ப்பார்க்கப்படுகிறது. கேரளாவில் இதுவரை எந்த தமிழ் படமும் வசூலித்திராத வகையில், விக்ரம் படம் 25 கோடிகள் வசூலித்துள்ளது.
படம் வெளியாகி பத்தே நாள்களில் வசூல் வேட்டை நிகழ்த்தியுள்ள இப்படம், விரைவில் பாகுபலி 2 சாதனைகளை முறியடிக்கக்கூடும் என எதிர்ப்பார்க்கப்படுகிறது.