தமிழ் மக்களின் வாழ்வியலோடு ஒன்றாக கலந்தது சினிமா பாடல்கள். ஒவ்வொரு காலகட்டத்திலும் சினிமா பாடல்கள் ரசிகர்களால் கொண்டாடப்பட்டு வருகிறது. பாடல்களை மாத்திரம் அல்ல பாடகர்களையும் ரசிகர்கள் கொண்டாடுகிறார்கள். அப்படி தன்னுடைய மயக்கும் குரலால் கேட்போரை கரைய வைக்கக்கூடிய பாடகிகளில் ஒருவர் பின்னணி பாடகி மதுஸ்ரீ.
அறிமுக பாடல் :
பெங்காலியை சேர்ந்த மது ஸ்ரீ தமிழ், தெலுங்கு, கன்னடம், ஹிந்தி, பெங்காலி என பல மொழிகளில் ஏராளமான பாடல்களை பாடியுள்ளார். 2003ல் இசையமைப்பாளர் வித்யாசாகர் இசையில் வெளியான "ஆஹா எத்தனை அழகு" படத்தில் நிலவே நிலவே... என்ற பாடலில் உதித் நாராயணனோடு இணைந்து பாடியது தான் தமிழ் சினிமாவில் மது ஸ்ரீ அறிமுகமான முதல் பாடல்.
ஏராளமான ஹிட்ஸ் :
ஏ.ஆர். ரஹ்மான் இசையில் 'ஆயுத எழுத்து' படத்தில் இடம் பெற்ற 'சண்டக்கோழி கோழி...' பாடல் தான் மது ஸ்ரீ குரலில் சூப்பர் ஹிட் வெற்றிபெற்ற முதல் பாடல். அதை தொடர்ந்து மயிலிறகே, டிங் டாங் கோயில் மணி, வாஜி வாஜி வாஜி, மருதாணி, கண்ணன் வரும் வேளை, ரகசிய கனவுகள், உன் பெயரே தெரியாது என ஏராளமான ஹிட் பாடல்களை பாடியுள்ளார். அவரின் கொஞ்சும் தமிழ் உச்சரிப்புக்கே ஏராளமான ரசிகர்களை பெற்றவர்.
ட்ரெண்டிங் மல்லிப்பூ :
அந்த வரிசையில் சமீபத்தில் ஏ.ஆர். ரஹ்மான் இசையில் சிம்பு நடிப்பில் வெளியான 'வெந்து தணிந்தது காடு' படத்தில் இடம் பெற்ற பிளாக் பஸ்டர் ஹிட் பாடலான 'மல்லிப்பூ வைச்சு வைச்சு வாடுதே...' பாடலுக்கு சொந்தக்காரி. இப்பாடலுக்கு ஏராளமான விருதுகளை குவித்துள்ளார். பெரியவர்கள் முதல் சிறியவர்கள் வரை இப்படலுக்கு ரீல்ஸ் செய்து இன்ஸ்டாவில் ட்ரெண்டிங் செய்தார்கள்.
2கே கிட்ஸ் ரெக்வஸ்ட் :
சோசியல் மீடியாவில் ஆக்டிவாக இருக்கும் மது ஸ்ரீயிடம் ரசிகர்கள் தமிழ் பாடல்கள் பாட சொல்லி ரெக்வஸ்ட் செய்து வருகிறார்கள். அதிலும் குறிப்பாக 2கே கிட்ஸ் மது ஸ்ரீயின் மருதாணி, சண்டக்கோழி, மயிலிறகே போன்ற ஓல்ட் ஹிட்ஸ் பாடல்களை பாட சொல்லி ரெக்வஸ்ட் செய்துள்ளார்கள்.
ரசிகர்களின் வேண்டுகோளை பூர்த்தி செய்யும் வகையில் ஆயுத எழுத்து திரைப்படத்தில் இடம்பெற்ற அவரின் முதல் சூப்பர் ஹிட் பாடலான 'சண்டக்கோழி' பாடலை பாடி அனைவரும் மெய்சிலிர்க்க வைத்துள்ளார். அவரின் இந்த வீடியோ சோசியல் மீடியாவில் மிகவும் வைரலாக பகிரப்பட்டு லைக்ஸ்களை குவித்து வருகிறது.