Just In
Celebration at Maaveeran set : களைகட்டிய 'மாவீரன்' படக்குழு... கேக் வெட்டி கொண்டாட்டம்... இணையத்தில் வைரலாகும் வீடியோ
சிவகார்த்திகேயனின் 11 ஆண்டுகால திரைப்பயணத்தை கொண்டாடும் வகையில் கேக் வெட்டி கொண்டாடினர் 'மாவீரன்' படக்குழு. அந்த கொண்டாட்டத்தின் வீடியோ சோசியல் மீடியாவில் வைரலாக பரவி வருகிறது.
சின்னத்திரத்தில் ஒரு காமெடி நிகழ்ச்சி மூலம் முதன் முதலில் அடியெடுத்து வைத்து ஒரு தொகுப்பாளராக இருந்து பின்னர் குறுகிய காலத்திலேயே தமிழ் சினிமாவில் முன்னணி நடிகராக வலம் வரும் நடிகர் சிவகார்த்திகேயன் தனது 11 ஆண்டுகால திரைப் பயணத்தை நிறைவு செய்துள்ளார்.
பன்முக கலைஞன் சிவகார்த்திகேயன் :
சின்னத்திரை டூ வெள்ளித்திரை பயணித்து மாபெரும் வெற்றி பெற்ற கலைஞர்களில் ஒருவரான நடிகர் சிவகார்த்திகேயன் முதன் முதலில் தமிழ் சினிமாவில் அறிமுகமானது 2012ம் ஆண்டு பாண்டிராஜ் இயக்கத்தில் வெளியான 'மெரினா' திரைப்படம் மூலம் தான். அதை தொடர்ந்து அவர் நடித்த ஒவ்வொரு படத்திலும் தன்னை கொஞ்சம் கொஞ்சமாக செதுக்கி இன்று நடிகர் மட்டுமின்றி பாடலாசிரியர், தயாரிப்பாளர், பாடகர் என பன்முக கலைஞராக திறம்பட தனது திறமைகளை வளர்த்துக் கொண்டுள்ளார். இவருக்கு சிறியவர்கள் முதல் பெரியவர்கள் வரை ஏராளமான ரசிகர்கள் உள்ளனர். அனைவருக்கும் நம்ம வீட்டு பிள்ளையாகவே திகழ்கிறார் சிவகார்த்திகேயன் என்பதை ஒருபோதும் மறுக்க முடியாது.
'மண்டேலா' இயக்குனருடன் கூட்டணி :
தற்போது சிவகார்த்திகேயன் இயக்குனர் மடோன் அஸ்வினுடன் கூட்டணி சேர்ந்துள்ள திரைப்படம் 'மாவீரன்'. 'மண்டேலா' திரைப்படத்திற்காக இரண்டு தேசிய விருதுகளை பெற்றவர் மடோன் அஸ்வின் என்பது குறிப்பிடத்தக்கது. சிவகார்த்திகேயன் நடிப்பில் சமீபத்தில் வெளியான பிரின்ஸ் திரைப்படத்தை தயாரித்த சாந்தி டாக்கிஸ் நிறுவனம் தான் தற்போது அவர் நடித்து வரும் மாவீரன் திரைப்படத்தை தயாரிக்கிறது.
வைரல் வீடியோ :
மிகவும் விறுவிறுப்பாக நடைபெற்று கொண்டு இருக்கும் மாவீரன் படப்பிடிப்பு தளத்தில் சிவகார்த்திகேயனின் 11 ஆண்டுகால திரைப்பயணத்தை கொண்டாடும் வகையில் கேக் வெட்டி கொண்டாடிய வீடியோ காட்சிகளை வெளியிட்டுள்ளது படக்குழு. இந்த வீடியோவில் நடிகை சரிதா, இயக்குனர் மடோன் அஸ்வின் உள்ளிட்டோர் சிவகார்த்திகேயனுக்கு கேக் ஊட்டிவிடுவது, செல்ஃபி எடுத்துக்கொள்வது போன்ற காட்சிகள் இடம்பெற்றுள்ளன. மேலும் மாவீரன் படத்தின் போஸ்டர் ஒன்றையும் வெளியிட்டது படக்குழு. இந்த வீடியோ சோசியல் மீடியாவில் மிகவும் வைரலாக பரவி வருகிறது. இப்படம் ஜூன் மாதம் வெளியாகும் என எதிர்பார்க்கப்படுகிறது.