மார்ட்டின் ஸ்கார்செஸி இயக்கி, லியோனார்டோ டிகாப்ரியோ நடித்திருக்கும் கில்லஸ் ஆஃப் தி ஃப்ளவர் மூன் திரைப்படம் வருகின்ற அக்டோபர் 20ஆம் தேதி வெளியாக இருக்கிறது.


லியோனார்டோ டிகாப்ரியோ  ( Leonardo dicaprio )




 உலக திரையுலகம் போற்றும் நடிகர்களில் ஒருவர் லியோனார்டோ டிகாப்ரியோ. டைட்டானிக் படத்தில் ஜாக் என்கிற கதாபாத்திரத்தில் நடித்து கவனத்தை ஈர்த்த டிகாப்ரியோ ஒவ்வொரு படத்திற்கும் தனது நடிப்பின் முதிர்ச்சியை பிரதிபலித்தபடி இருக்கிறார்.


Inception, Revenant, Shutter Island, Once upon a time in Hollywood உள்ளிட்ட படங்களில் இவரது நடிப்பு விமர்சன ரீதியாக பாராட்டப்பட்டது. இதுவரை 8 முறை சிறந்த நடிகருக்கான ஆஸ்கர் விருதிற்காக பரிந்துரைக்கப்பட்டு Revenant படத்தில் தனது நடிப்பிற்காக ஆஸ்கர் வென்றார்.


தற்போது ஹாலிவுட் ஜாம்பவான் இயக்குநர் மார்ட்டின் ஸ்கார்செஸி இயக்கத்தில் அவர்  நடித்திருக்கும் படம் Killers Of The Flower Moon. முன்னதாக இந்தப் படத்தின்  இரண்டு டிரெய்லர்கள் வெளியாகி வரவேற்பைப் பெற்ற நிலையில், தற்போது புதிய டிரெய்லர் ஒன்றை வெளியிட்டுள்ளது பாராமெளண்ட் நிறுவனம். வரும் அக்டோபர் மாதம் 20 ஆம் தேதி இந்தப் படம் திரைக்கு வர இருக்கிறது.


கில்லர்ஸ் ஆஃப் தி ஃப்ளவர் மூன் (Killers Of The Flower Moon)



 எண்ணெய் வளத்திற்காக ஓசாஜே என்கிற பழங்குடி மக்கள் மர்மமான முறையில் அமெரிக்கர்களால் கொல்லப்பட்ட உண்மைச் சம்பவத்தை மையப்படுத்தி எழுதப்பட்ட புத்தகத்தை தழுவி எடுக்கப்பட்டப் படம் ‘கில்லர்ஸ் ஆஃப் தி ஃப்ளவர் மூன்’.


ஒசாஜே மக்களிடம் இருந்து அவர்களின் நிலத்தை பறிக்க நியமிக்கப்படுகிறார் லியோனார்டோ டிகாப்ரியோ. அந்த இனத்தைச் சேர்ந்த பெண் மீது காதல் கொண்டு அவரை திருமணமும் செய்துகொள்கிறார். தனது மனைவியின் மீதான காதல் மற்றும் தனது சொந்த நாட்டினத்தவர்களுக்கு தான் செய்ய  வேண்டிய கடமை என இரண்டிற்கு நடுவில் சிக்கித் தவித்து நிற்கிறார் கதாநாயகன். இதில் அவர் யார் பக்கம் நிற்கப் போகிறார் என்பதே கதை.


மார்ட்டின் ஸ்கார்செஸி




ஹாலிவுட்டின் மிக முக்கியமான இயக்குநர்களில் ஒருவர் மார்ட்டின் ஸ்கார்செஸி. ஹாலிவுட்டில் மட்டுமில்லாமல் உலகம் முழுவதும் இருக்கும் இயக்குனர்கள் மார்ட்டினை தங்களது குருவாக கருதி வருகிறார்கள். தமிழில் இன்று பல திரைப்படங்கள் மார்ட்டின் ஸ்கார்செஸியின் ஒரு காட்சியாவது நினைவுபடுத்தாமல் இருக்காது.


ஹாலிவுட்டில் கிட்டதட்ட 25  திரைப்படங்கள், 16 ஆவணப்படங்களை இயக்கியுள்ளார் மார்ட்டின். தற்போது Killers of the flower moon என்கிற படத்தை இயக்கியுள்ளார். லியோனார்டோ டிகாப்ரியோ மற்றும் ராபர்ட் டி நிரோ ஆகியவர்கள் முக்கிய கதாபாத்திரத்தில் நடித்துள்ளார்கள். கடந்த மே மாதம் நடந்து முடிந்த சர்வதேச கான் திரைப்பட விழாவில் இந்தப் படத்தினைப் பார்த்த பார்வையாளர்கள் படத்தை பாராட்டும் விதத்தில் சுமார் 10 நிமிடம் தொடர்ந்து கைதட்டி மார்டின் ஸ்கார்செஸியைப் பெருமைப்படுத்தினார்கள் என்பது குறிப்பிடத்தக்கது.