காதலிக்க நேரமில்லை
வணக்கம் சென்னை படத்தின் மூலம் இயக்குநராக அறிமுகமானார் கிருத்திகா உதயநிதி. தனது முதல் படத்தை ரொமாண்டிக் காமெடி படமாக இயக்கி ஹிட் கொடுத்த கிருத்திகா அடுத்தபடியாக விஜய் ஆண்டனி நடித்த காளி படத்தை இயக்கினார். இந்தப் படம் எதிர்பார்த்த வெற்றிபெறவில்லை.
இதனையடுத்து கடந்த ஆண்டு காளிதாஸ் ஜெயராம், தன்யா ரவிச்சந்திரன் நடிப்பில் ஜீ5 ஓடிடி தளத்திற்காக “பேப்பர் ராக்கெட்” என்ற வெப் சீரிஸ் ஒன்றை இயக்கியிருந்தார். இதுவும் ரசிகர்களிடம் வரவேற்பை பெற்ற நிலையில் தற்போது தனது அடுத்தப் படமான காதலிக்க நேரமில்லை படத்தை இயக்கிவந்தார் .
காதலிக்க நேரமில்லை
ஜெயம் ரவி நாயகனாக நடிக்கும் இப்படத்தில் நித்யா மேனன் நாயகியாக நடித்துள்ளார். ஏ.ஆர்.ரஹ்மான் இசையமைக்கும் இந்த படத்தை ரெட் ஜெயன்ட் நிறுவனம் தயாரிக்கிறது. கடந்த ஆண்டு இப்படத்தின் ஃபர்ஸ்ட் லுக் போஸ்டர் வெளியான நிலையில் தற்போது இப்படத்தின் படப்பிடிப்பு நிறைவடைந்துள்ளது. படப்பிடிப்பு நிறைவடைந்த தகவலை கிருத்திகா உதயநிதி தனது எக்ஸ் தளத்தில் பகிர்ந்துள்ளார். கூடிய விரைவில் இப்படத்தின் ரிலீஸ் தேதி அறிவிக்கப் படும் என்று எதிர்பார்க்கலாம். வணக்கம் சென்னை படத்தைப் போலவே இப்படமும் ரொமான்ஸ் மற்றும் காமெடி கலந்து இருக்கும் என்று எதிர்பார்க்கலாம்.
ஜெயம் ரவி நடிக்க இருக்கும் படங்கள்
காதலிக்க நேரமில்லை படத்தைத் தொடர்ந்து நடிகர் ஜெயம் ரவி இயக்குநர் பாண்டிராஜ் இயக்கத்தில் நடிக்க இருப்பதாக தகவல் வெளியாகியுள்ளது. ஹோம் மூவி மேக்கர்ஸ் இப்படத்தை தயாரிக்க இருக்கிறார்கள். வரும் ஜூலை மாதம் இப்படத்தின் படப்பிடிப்பு துவங்கும் என எதிர்பார்க்கப் படுகிறது. இது தவிர்த்து எம் ராஜேஷ் இயக்கத்தில் ஜெயம் ரவி பிரதர் படத்தில் நடித்து வருகிறார். பிரியங்கா மோகன் , பூமிகா சாவ்லா , சரண்யா பொன்வண்ணன் , வி.டி.வி கணேஷ் உள்ளிட்டவர்கள் இப்படத்தில் நடித்து வருகிறார்கள்
ஜெயம் ரவி நடிப்பில் மிக பிரம்மாண்டமாக உருவாகி வரும் மற்றொரு படம் ஜீனி , புவனேஷ் அர்ஜூனன் இயக்கத்தில் சுமார் 100 கோடி ரூபாய் செலவில் இப்படம் உருவாகி வருகிறது. வேல்ஸ் இண்டர்நேஷனல் சார்பாக ஐசரி கே கணேஷ் இப்படத்தை தயாரித்து வருகிறார். வமிகா கப்பி , க்ரித்தி ஷெட்டி , கல்யாணி பிரியதர்ஷன் உள்ளிட்டவர்கள் இப்படத்தில் நடித்து வருகிறார்கள். ஏ.ஆர் ரஹ்மான் இப்படத்திற்கு இசையைமைத்து வருகிறார்.