உடல்நலக்குறைவு காரணமாக நடிகர் கமல்ஹாசன் மருத்துவமனையில் அனுமதிக்கப்பட்டுள்ளதாக தகவல் வெளியாகியுள்ளது.
கடந்த சில தினங்களுக்கு முன்பு நடிகர் கமல்ஹாசன் ஹைதராபாத் சென்றார். அங்கு சில நிகழ்ச்சிகளில் கலந்துகொண்டு நேற்று மதியம் சென்னை திரும்பினார். அப்போது அவருக்கு திடீரென உடல்நலக்குறைவு ஏற்பட்டதாக தெரிகிறது. இதையடுத்து அவர் சென்னையில் உள்ள பிரபல தனியார் மருத்துவமனையில் அனுமதிக்கப்பட்டார். அங்கு அவருக்கு சிகிச்சை அளித்த மருத்துவர்கள் அவரை ஓய்வு எடுக்குமாறு அறிவுறுத்தியுள்ளனர்.
தொடர்ந்து மருத்துமனையிலேயே அனுமதிக்கப்பட்டுள்ளார். இன்று டிஸ்சார்ஜ் செய்ய வாய்ப்புள்ளதாக கூறப்படுகிறது. இது வழக்கமான பரிசோதனைதான் என கமல்ஹாசன் வட்டாரங்கள் தகவல் தெரிவிக்கின்றன. தற்பொழுது இந்தியன் பாகம் 2 படத்தில் நடித்து வரும் கமல்ஹாசன், கடந்த இரண்டு நாட்களுக்கு முன்பு ஹைதராபாத்தில் பிரபல இயக்குனர் கே.விஸ்வநாதன் பிறந்தநாள் விழாவில் கலந்து கொண்டார். இந்த நிகழ்ச்சியில் பங்கேற்று சென்னை திரும்பிய சூழலில், கமல்ஹாசனுக்கு உடல்நலக்குறைவு ஏற்பட்டுள்ளது.
தற்போது வரை கமல்ஹாசனின் உடல்நலம் குறித்து, மருத்துவமனை தரப்பில் இருந்து அதிகாரப்பூர்வ தகவல்கள் ஏதும் வெளியாகவில்லை. விரைவில் அவரது உடல்நலம் குறித்து மருத்துவமனை தரப்பில் இருந்து அதிகாரப்பூர்வ தகவல் வெளியாகும் என்று எதிர்பார்க்கப்படுகிறது. தனியார் தொலைக்காட்சியில் ஒளிபரப்பாகும் பிக்பாஸ் சீசன் 6 நிகழ்ச்சியின் தொகுப்பாளராகவும் உள்ள கமல்ஹாசன், வாரந்தோறும் அதன் படப்பிடிப்பிலும் பங்கேற்று வருகிறார்.
கமல்ஹாசன் உடல்நலக்குறைவால் மருத்துவமனையில் அனுமதியாகியுள்ளதால், அவரது ரசிகர்கள் அதிர்ச்சி அடைந்துள்ளனர்.