‘இந்தியன் 2’ படத்தில் காஜல் அகர்வால் மீண்டும் இணைய உள்ளதாக தகவல் வெளியாகியுள்ளது.
தமிழ் சினிமாவின் முன்னணி இயக்குநரான ஷங்கர் இயக்கத்தில் நடிகர் கமல்ஹாசன் நடிப்பில் கடந்த 1996 ஆம் ஆண்டு வெளியான திரைப்படம் இந்தியன். மிகப் பெரிய வெற்றி பெற்ற இந்தப் படத்தின் இராண்டாம் பாகத்தை எடுக்க முயற்சிகள் நடைபெற்ற நிலையில், அதிகாரப்பூர்வமாக அறிவிப்பு வெளியாகி பூஜையும் போடப்பட்டது.
லைகா நிறுவனர் சுபாஸ்கரன் தயாரித்து வருகிற இந்தப்படத்தில் நடிகையாக காஜல் அகர்வாலும் பிரியா பவானி ஷங்கர், சித்தார்த் உள்ளிட்ட பலர் நடிகர்களாக ஒப்பந்தம் செய்யப்பட்டனர். இசையமைப்பாளராக அனிருத் படத்திற்கு இசையமைக்கிறார்.
படத்திற்காக பிரம்மாண்ட செட் அமைக்கப்பட்டு ஷூட்டிங் நடந்துக்கொண்டிருந்த சமயத்தில் , கிரேன் நிலை தடுமாறி கீழே விழுந்து உதவி இயக்குநர் உட்பட மூன்று பேர் உயிரிழந்தனர். இதனால் சிறிது காலம் படப்படிப்பு நிறுத்தி வைக்கப்பட்டது. இதனைத்தொடர்ந்து சட்டமன்ற தேர்தல் நடைபெற்ற நிலையில் நடிகர் கமல்ஹாசன் அரசியல் சார்ந்த பணிகளில் கவனம் செலுத்த தொடங்க சென்று விட்டார். படத்தில் நடித்த காஜல் அகர்வாலுக்கும் திருமணமாகியது. இதனால் அவர் படத்தில் இருந்து விலகியதாகவும் சொல்லப்பட்டது.
அதன் பிறகு கொரோனா ஊரடங்கும் தொற்றிக்கொண்டது. இதனிடையே லைகா நிறுவனம் ஷங்கர் தரப்பு படத்தை விரைந்து முடித்துக்கொடுக்க வேண்டும் என நீதிமன்றத்தில் வழக்கு தொடர்ந்தது. இந்தப் பிரச்னையை விசாரித்த நீதிமன்றம் பிரச்னையை பேசி தீர்த்துக்கொள்ள வேண்டும் எனக் கூறியது. ஆனால் இருதரப்பிற்கும் இடையேயான பிரச்னை தீரவில்லை. இதனிடையே பிரச்னையில் உதயநிதி தலையிட்டு, இந்தியன் 2 வேலைகளை தொடங்க ஏற்பாடு செய்துள்ளதாக சொல்லப்பட்டது. இதனிடையே படத்தில் கதாநாயகியாக தீபிகா படுகோன் நடிக்க இருப்பதாக சொல்லப்பட்ட நிலையில், படத்தில் மீண்டும் படத்தில் காஜல் அகர்வால் நடிக்க இருப்பதாக தகவல் வெளியாகியுள்ளது.