தமிழ் சினிமாவின் முன்னணி இயக்குநர்களில் ஒருவர் செல்வராகவன். அவர் இயக்கிய காதல் கொண்டேன், 7ஜி ரெயின்போ காலனி, புதுப்பேட்டை, ஆயிரத்தில் ஒருவன் போன்ற இடங்கள் பலரது ஃபேவரைட். மேலும், தமிழ் சினிமாவின் ஜீனியஸ்களில் செல்வராகவனும் ஒருவர் என்று ரசிகர்கள் அழைப்பார்கள்.
அவர் தற்போது தனது தம்பியான தனுஷை வைத்து நானே வருவேன் என்ற படத்தை இயக்கிவருகிறார். இதுவரை தனுஷும், செல்வராகவனும் இணைந்த படங்களான துள்ளுவதோ இளமை, காதல் கொண்டேன், மயக்கம் என்ன ஆகிய படங்கள் இன்றுவரை ரசிகர்களின் ஃபேவரைட்டாக இருக்கின்றன. இதன் காரணமாக நீண்ட நாள் கழித்து இருவரும் இணைந்திருக்கும் நானே வருவேன் படத்துக்கு பலத்த எதிர்பார்ப்பு எழுந்துள்ளது.
கலைப்புலி எஸ். தாணு தயாரிக்கும் இப்படத்திற்கு யுவன் ஷங்கர் இசையமைக்கிறார். மேலும், அரவிந்த் கிருஷ்ணா ஒளிப்பதிவு செய்வதாக இருந்தது. ஆனால் அவர் திடீரென படத்திலிருந்து விலகிவிட்டார். இதனையடுத்து செல்வராகவன் நடிகராக அவதாரம் எடுத்திருக்கும் சாணிக்காயிதம் படத்துக்கு ஒளிப்பதிவாளராக பணியாற்றிய யாமினி நானே வருவேன் படத்துக்கு ஒளிப்பதிவாளராக ஒப்பந்தமானார். ஆனால் என்ன காரணத்தினாலோ அவரும் படத்திலிருந்து விலகிவிட்டார்.
இந்நிலையில் செல்வராகவன் நானே வருவேன் திரைப்படத்திற்கான அனைத்து பாடல்களும் முடிந்துவிட்டதாக செல்வராகவன் தெரிவித்துள்ளார். இதுகுறித்து அவர் தனது ட்விட்டர் பக்கத்தில் யுவன் ஷங்கர் ராஜாவுடன் இருக்கும் புகைப்படத்தை பகிர்ந்து, நானே வருவேன் பாடல்கள் அனைத்தும் முடிந்தன. உங்களுடன் பகிர்ந்துகொள்வதற்கு ஆர்வமாக இருக்கிறேன்” என குறிப்பிட்டுள்ளார்.
செல்வராகவன் - யுவன் காம்போவில் வந்த துள்ளுவதோ இளமை, காதல் கொண்டேன், புதுப்பேட்டை, 7ஜி ரெயின்போ காலனி உள்ளிட்ட படங்களில் இடம்பெற்ற பாடல்கள் அனைத்தும் இன்றுவரை அனைவராலும் கொண்டாடப்படுபவை. இடையில் வந்த என்ஜிகே படத்தில் இந்தக் கூட்டணி ரசிகர்களின் எதிர்பார்ப்பை பூர்த்தி செய்யவில்லை. எனவே இந்தப் படத்தில் இருவரும் பழைய ஃபார்மில் வருவார்களா என்ற எதிர்பார்ப்பு ரசிகர்களிடம் உருவாகியிருக்கிறது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்