செப்டம்பர் 7ஆம் தேதி வெளியாக இருக்கும் ஜவான் திரைப்படத்தின்புதிய போஸ்டர் ஒன்றை படக்குழு பகிர்ந்துள்ளது. முன்னதாக ஷாருக்கானின் போஸ்டர் ஒன்றை படக்குழு பகிர்ந்த நிலையில் படத்தில் கதாநாயகியாக நடித்திருக்கும் நயன்தாரா மற்றும் வில்லனாக நடித்திருக்கும் விஜய் சேதுபதி என அனைவரும் இந்தப் போஸ்டரில் இடம்பிடித்துள்ளனர்.
அட்லீயின் பாலிவுட் என்ட்ரி
ராஜா ராணியில் தன் இயக்குநர் பயணத்தைத் தொடங்கி, நடிகர் விஜய்யை வைத்து இயக்கி சூப்பர் ஹிட் படங்களைக் கொடுத்த அட்லீ, தற்போது பாலிவுட்டில் கால் பதிக்க இருக்கிறார். பாலிவுட் கிங் என ரசிகர்கள் கொண்டாடும் ஷாருக்கானை வைத்து ஜவான் படத்தை அட்லீ இயக்கியுள்ளார்.
தான் மட்டும் பாலிவுட்டிற்கு செல்லாமல் கோலிவுட்டில் இருந்து ஒரு நட்சத்திரப் பட்டாளத்தையே பாலிவுட்டுக்கு அழைத்துச் சென்றுள்ளார் அட்லீ. அந்த வகையில் தென்னிந்தியாவின் லேடி சூப்பர் ஸ்டார் எனக் கொண்டாடப்படும் நயன்தாரா ஜவானில் ஹீரோயினாகவும், மற்றொரு ஹீரோயினாக தீபிகா படுகோனும் நடித்துள்ளனர்.
மாஸ் வில்லனாகும் விஜய் சேதுபதி
பவுர்ஃபுல் ஹீரோ, ஹீரோயின் வரிசையில் மாஸ் வில்லனை காட்ட, விஜய் சேதுபதியை தேர்வு செய்துள்ளார் அட்லீ. ஏற்கெனவே பாலிவுட்டில் சில படங்களிலும், வெப் ரீசிஸ்களிலும் கலக்கி வரும் விஜய் சேதுபதியை ஷாருக்கானுக்கு வில்லனாக நடிக்க வைத்துள்ளார் அட்லீ. இவர்களுடன் பிரியாமணி, யோகி பாபு உள்ளிட்ட பல கோலிவுட் பிரபலங்களும் இப்படத்தில் இணைந்துள்ளனர். இப்படி நட்சத்திர பட்டாளமே நடித்துள்ள ஜவான் படத்துக்கு அனிருத் இசை அமைத்துள்ளார்.
நீங்க நல்லவரா கெட்டவரா
இந்த நிலையில், ஜவானில் தான் நடித்திருக்கும் போஸ்டரை டிவிட்டரில் பகிர்ந்த ஷாருக்கான், ”நான் நல்லவனா, கெட்டவனா என்பதை தெரிந்து கொள்ள இன்னும் 30 நாட்களே உள்ளன. ரெடியா..?” என கேட்டுள்ளார். கையில் ரிவால்வாருடன், கூலிங்கிளாஸ் மற்றும் மொட்டை தலையுடன் மிரட்டும் ஷாருக்கானின் இந்த லேட்டஸ்ட் போஸ்டரை பார்த்த ரசிகர்கள் ஜவான் நல்லவனா, இல்லை கெட்டவனா என்ற விவாதத்தில் இறங்கியுள்ளனர்.
இதுவரை ஜவான் படத்தில் ஷாருக் கானின் போஸ்டர் மட்டுமே வெளியாகி இருந்த நிலையில் படத்தில் கதாநாயகியாக நடித்திருக்கும் நயந்தாரா மற்றும் வில்லனாக நடித்திருக்கும் விஜய் சேதுபதி அடங்கிய போஸ்டரை முதல் முறையாக வெளியிட்டுள்ளது படக்குழு
இந்த புது போஸ்டர் தற்போது இணையத்தில் வைரலாகி வருகிறது. பில்லா படத்தில் துப்பாக்கியுடன் கெத்தாக தோன்றிய நயந்தாராவின் கதாபாத்திரத்தை இந்த போஸ்டர் நினைவுபடுத்துகிறது என ரசிகர்கள் கூறிவருகிறார்கள்