நடிகர் ஷாருக்கான் நடித்துள்ள ஜவான் படத்தின் முதல் நாள் வசூலானது அதிகாரப்பூர்வமாக அறிவிக்கப்பட்டுள்ளதால் ரசிகர்கள் மகிழ்ச்சியடைந்துள்ளனர்.
தமிழ் சினிமாவின் முன்னணி இயக்குநராக உள்ள அட்லீ, இந்தி சினிமாவில் இயக்குநராக ’ஜவான்’ படத்தின் மூலம் அறிமுகமாகியுள்ளார். இந்த படத்தில் ஷாருக்கான், நயன்தாரா, யோகிபாபு, தீபிகா படுகோனே, விஜய் சேதுபதி, பிரியாமணி உள்ளிட்ட பலரும் நடித்துள்ளனர். இந்தி,தமிழ், தெலுங்கு ஆகிய மொழிகளில் வெளியாகியுள்ள ஜவான் படத்தை சொந்தமாக தயாரித்துள்ளது ஷாருக்கானின் ரெட் சில்லி நிறுவனம். இப்படத்திற்கு அனிருத் இசையமைத்துள்ளார். இந்த படம் நேற்று தியேட்டரில் வெளியானது.
தமிழ் சினிமா ரசிகர்களிடத்தில் கலவையான விமர்சனங்களையும், பாலிவுட் திரையுலகில் மிகப்பெரிய வரவேற்பையும் பெற்றுள்ள ஜவான் திரைப்படம் முதல் நாள் எவ்வளவு வசூல் பெற்றுள்ளது என்பது அதிகாரப்பூர்வமாக அறிவிக்கப்பட்டுள்ளது. அதன்படி முதல் நாளில் இப்படம் ரூ.129 கோடி வசூலை பெற்றுள்ளதாக தெரிவிக்கப்பட்டுள்ளது. இதனை ரசிகர்கள் சமூக வலைத்தளங்களில் கொண்டாடி வருகின்றனர்.