நடிகை ஸ்ரீதேவி மற்றும் மும்பையில் இருக்கும் திரைப்பட தயாரிப்பாளர்களில் ஒருவரான போனி கபூர் அவர்களின் மூத்த மகள் ஜான்வி கபூர். இவர் ஹிந்தி திரைப்பட உலகில் முன்னணி கதாநாயகிகளில் ஒருவராக வலம் வந்து கொண்டு இருக்கிறார். 2008ம் ஆண்டு வெளியான தடக் ஹிந்தி திரைப்படம் மூலம் கதாநாயகியாக அறிமுகமானவர் ஜான்வி கபூர். அவர் நடித்த முதல் படமே கமர்சியலாக சூப்பர் ஹிட் படமானது. ஏராளமான ரசிகர்களை தன் பக்கம் ஈர்த்தவர் ஜான்வி கபூர். சினிமாவில் கவனம் செலுத்தி வரும் ஜான்வி தென்னிந்தியாவில் கவனிக்கவைத்த சில படங்களை குறி வைத்து ரீமேக் செய்து வருகிறார். தனக்கென தனி ட்ராக்கை உருவாக்கிக்கொண்டிருக்கும் ஜான்வி மலையாளப்படம் ஹெலனை கையில் எடுத்து ரீமேக் செய்தார். தற்போது நம்மூரில் நயந்தாரா கலக்கிய கோலமாவு கோகிலாவை ரீமெக் செய்து குட் லக் ஜெர்ரி என்ற திரைப்படத்தில் நடித்தார். நயன்தாரா கதாபாத்திரத்தில் ஜான்வி நடித்திருந்தார். இப்படம் டிஸ்னி + ஹாட்ஸ்டாரிலும் வெளியிடப்பட்டது. இப்படம் பாலிவுட் ரசிகர்களிடம் நல்ல வரவேற்பை பெற்றுள்ளது.
தென்னிந்திய மொழித்திரைப்படங்களை ரீமேக் செய்தால் போதுமா, தென்னிந்திய மொழியில் ஜான்வி எப்போது நடிப்பார் என தொடர்ந்து ரசிகர்கள் கேள்வி எழுப்பி வருகின்றனர். அதன்படி விரைவில் ஜான்வி தெலுங்கில் நடிக்கவுள்ளதாகவும் தகவல்கள் வெளியானவண்ணமே இருக்கிறது. குறிப்பாக தெலுங்கு நடிகர் ஜூனியர் என் டி ஆருடன் ஜான்வி கைகோக்கவுள்ளதாக தகவல்கள் கசிந்தன. இது குறித்து தற்போது வாய்திறந்துள்ளார் ஜான்வி. நேர்காணல் ஒன்றில் பேசிய ஜான்வி, "நான் அதற்குத் தயாராக இருக்கிறேன். ஒரு டோலிவுட் திரைப்படம் அல்லது தென்னிந்திய திரைப்படம் ஒன்றில் நடிக்க நான் ஆர்வமாக உள்ளேன்.
ஜூனியர் என்.டி.ஆர் சாருடன் பணிபுரியும் வாய்ப்பு எனக்கு மிகவும் முக்கியம். அவர் ஒரு ஜாம்பவான், ஆனால் துரதிர்ஷ்டவசமாக, அந்த வாய்ப்பு இன்னும் வரவில்லை. நான் காத்திருக்கிறேன், சிறந்ததை எதிர்பார்க்கிறேன்" என்றார். மேலும் தமிழ் திரைப்படம் குறித்து பேசிய ஜான்வி, மணிரத்னம் சாரின் விண்டேஜ் படம்போல ஒரு படத்தில் என்னுடைய அறிமுகம் இருக்க வேண்டும். ''ரஹ்மான் பாடல் பின்னணியில் ஒலிக்க மிகவும் எளிமையான உடையில் ஐஸ்வர்யா ராய் மலைகள் மற்றும் நீர்வீழ்ச்சிகளுக்கு நடுவே ஓடும் அந்தக்காட்சி போல ஒரு சினிமாவில் நடிக்க விரும்புகிறேன் என்றார்.
முன்னதாக, நிகழ்ச்சியில் கலந்துகொண்ட ஜான்வி தனக்கு வரப்போகும் கணவர் குறித்து தன் தந்தையின் எதிர்பார்ப்பு இதுதான் என கூறினார்.நேர்காணலில் பேசிய ஜான்வி, என் கணவர் குறித்து பெரிய எதிர்பார்ப்பு எல்லாம் அவருக்கு இல்லை. ஆனால் வரப்போகும் உன் கணவர் என்னைவிட உயரமான ஆளாக இருக்கவேண்டும் எனக் கூறுகிறார். என் அப்பாவின் உயரமே 6 அடி ஒரு இன்ச் என்றார்.