நடிகர் ரஜினிகாந்த் நடித்துள்ள ஜெயிலர் (Jailer) படம் மிகப்பெரிய வெற்றியைப் பெற்றுள்ள நிலையில், தயாரிப்பாளர் கலாநிதி மாறன் இசையமைப்பாளர் அனிருத்திற்கு காசோலை வழங்கியுள்ளார்.
மாஸ் காட்டிய ஜெயிலர் படம்
தமிழ் சினிமாவின் சூப்பர் ஸ்டாராக கொண்டாடப்படும் நடிகர் ரஜினிகாந்தின் 169வது படமாக உருவான “ஜெயிலர்” படம் கடந்த ஆகஸ்ட் 10 ஆம் தேதி உலகமெங்கும் தியேட்டர்களில் வெளியானது. நெல்சன் திலீப்குமார் இயக்கிய இந்த படத்தை சன் பிக்சர்ஸ் நிறுவனம் பெரும் பொருட்செலவில் தயாரித்திருந்தது. தமன்னா, ரம்யா கிருஷ்ணன், மிர்னா, ரித்விக், மோகன்லால், சிவராஜ் குமார், சுனில் வர்மா, ஜாக்கி ஷெராஃப் ,யோகிபாபு, விநாயகம், வசந்த் ரவி, யோகிபாபு, சுனில் என முன்னணி நட்சத்திரங்கள் இப்படத்தில் இணைந்திருந்தனர். தமிழ், தெலுங்கு, மலையாளம், கன்னடம், இந்தி ஆகிய மொழிகளில் வெளியான ஜெயிலர் படத்திற்கு அனிருத் இசையமைத்திருந்தார்.
முன்னதாக பாடல்கள், ட்ரெய்லர், இசை வெளியீட்டு விழா என ஜெயிலர் படம் மீதான எதிர்பார்ப்பு எகிறத் தொடங்கிய நிலையில் டிக்கெட் முன்பதிவிலும் சாதனை படைத்தது. தொடர்ந்து விடுமுறை தினங்களாக வந்ததால் ஜெயிலர் படம் வசூலில் சாதனைப் படைத்தது. கிட்டதட்ட ரூ.525 கோடி வரை அதிகாரப்பூர்வமாக படம் வசூலித்துள்ளதாக சன் பிக்சர்ஸ் நிறுவனம் தெரிவித்துள்ளது.
கொண்டாட்டத்தில் படக்குழு
இதனிடையே ஜெயிலர் படம் மிகப்பெரிய வெற்றியை பெற்றதால் கடந்த வாரம் தயாரிப்பாளர் கலாநிதிமாறன் நடிகர் ரஜினிகாந்தை சந்தித்து சம்பளத்தொகையை காசோலையாக வழங்கினார். மேலும் பிஎம்டபிள்யூ கார் ஒன்றை பரிசாக வழங்கி ரஜினியை திக்குமுக்காட வைத்தார் கலாநிதிமாறன். இதேபோல் இயக்குநர் நெல்சன் திலீப்குமாருக்கும் காசோலையும், கார் ஒன்றையும் வழங்கினார். இதன் வீடியோ, புகைப்படங்கள் இணையத்தில் வைரலாகியுள்ளது. இதனிடையே ஜெயிலர் படத்தில் பணியாற்றிய மற்றவர்களுக்கு எதுவும் இல்லையா என ரசிகர்கள் கேள்வி எழுப்பினர்.
இந்நிலையில், இசையமைப்பாளர் அனிருத்துக்கும் காசோலை ஒன்றை வழங்கியுள்ளார் தயாரிப்பாளர் கலாநிதி மாறன். இன்றைய தினம் ஜெயிலர் படத்தின் 25வது நாள் கொண்டாடப்படும் நிலையில் தொடர்ந்து சன் பிக்சர்ஸ் நிறுவனம் ஜெயிலர் படம் தொடர்பான அப்டேட்டுகளை வெளியிட்டு வருகிறது.
ஓடிடியில் ஜெயிலர் ரிலீஸ்
இதற்கிடையில் பெரிதும் எதிர்பார்க்கப்பட்ட ஜெயிலர் படத்தின் ஓடிடி ரிலீஸ் தேதி அறிவிக்கப்பட்டுள்ளது. அதன்படி செப்டம்பர் 7 ஆம் தேதி அமேசன் பிரைம் ஓடிடி தளத்தில் வெளியாகவுள்ளது குறிப்பிடத்தக்கது.