விரைவில் திருமணம் செய்து கொள்ள இருக்கும் கெளதம் கார்த்தி - மஞ்சிமா மோகன் ஆகியோர் அண்மையில் எடுத்துக்கொண்ட புதிய படங்கள் சமூகவலைதளங்களில் வைரலாகி வருகிறது.
மணிரத்னத்தின் கடல் படம் மூலம் அறிமுகமான நடிகர் கார்த்திக்கின் மகன் கவுதம் கார்த்திக்கும், கௌதம் வாசுதேவ் மேனன் இயக்கத்தில் வெளியான 'அச்சம் என்பது மடமையடா' திரைப்படம் மூலம் தமிழ் சினிமாவில் அறிமுகமான நடிகை மஞ்சிமா மோகனும் ’தேவராட்டம்’ படத்தில் இணைந்து நடித்தனர்.
2019ஆம் ஆண்டு முத்தையா இயக்கத்தில் வெளியான 'தேவராட்டம்' படத்தின் படப்பிடிப்பு சமயத்தில் இருந்தே இருவரும் ஒருவர் மீது ஒருவர் காதலித்து வந்ததாகவும் விரைவில் திருமணம் செய்து கொள்ள போவதாகவும் தகவல்கள் வெளியாகின.
இருவரும் வெளிப்படையாகவே பல நிகழ்ச்சிகள், பொது இடங்களில் இணைந்து காணப்பட்டாலும் வெளிப்படையாக தங்களின் காதலை தெரிவித்து கொள்ளாமல் இருந்து வந்தனர். இந்த நிலையில், கடந்த அக்டோபர் மாதம் 31ம் தேதி தான் இருவரும் தங்களின் காதலை வெளிப்படையாக வெளியுலகிற்கு அறிவித்தனர்.
அதனைத்தொடர்ந்து நடிகை மஞ்சிமா மோகன் மற்றும் கௌதம் கார்த்திக் இருவருக்கும் வரும் நவம்பர் 28ம் தேதி சென்னையில் திருமணம் நடைபெறவுள்ளதாக முன்னதாகத் தகவல் வெளியானது. மேலும், இருவரும் தங்களின் திருமணத்துக்கு கைகளாலேயே தயாரிக்கப்பட்ட திருமண அழைப்பிதழைக் கொண்டு அனைவரையும் வரவேற்கிறார்கள் என்பன போன்ற சுவாரஸ்யத் தகவல்களும் முன்னதாக வெளியாகின.
இந்நிலையில் நேற்று முன் தினம் (23-11-2022) வடபழனியில் செய்தியாளர்களை ஜோடியாக சந்தித்த கவுதம் கார்த்திக் - மஞ்சிமா தாங்கள் இருவரும் வருகிற நவ. 28 ஆம் தேதி திருமணம் செய்து கொள்ள இருப்பதாக அறிவித்தனர்.
இது குறித்து கெளதம் கார்த்தி பேசும் போது, “ வரும் நவ.28 எனக்கும் மஞ்சிமாவுக்கும் திருமணம் நடைபெற உள்ளது. உங்கள் அனைவரின் ஆசிர்வாதமும் எங்களுக்குத் தேவை. இது ஒரு சிறிய, தனிப்பட்ட குடும்ப நிகழ்வு. ரிசப்ஷன் நிகழ்வு தனியாக நடத்தப்படவில்லை. திருமணத்துக்குப் பிறகு மீண்டும் உங்களை சந்திக்கிறோம்" என்றார். இந்த நிலையில் நடிகை மஞ்சிமா மோகன், கெளதம் கார்த்திக் ஆகியோர் இணைந்து எடுத்துக்கொண்ட புகைப்படங்கள் தற்போது சமூகவலைதளங்களில் வைரலாகி வருகிறது.