பிரபல நடிகர் அஜித் நடிப்பில் ஹெச். வினோத், இயக்கத்தில் வெளியாக உள்ள திரைப்படம் வலிமை. இந்தப் படத்தில் பாலிவுட் நடிகை ஹுமா குரேஷி கதாநாயகியாக நடித்து வருகிறார். இப்படத்தை போனி கபூர் மற்றும் ஜி ஸ்டியோஸ் இணைந்து தயாரித்து வருகின்றனர். அஜித் நடிக்கும் 61-வது படம் இது என்பதால் அவரது ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. இதன் காரணமாக அவருடைய ரசிகர்கள் சமூக வலைத்தளம் மற்றும் அனைத்து இடங்கள் என எங்கு பார்த்தாலும் வலிமை அப்டேட் சொல்லுங்க என்ற கேட்டுக்கொண்டு இருந்தனர்.
இந்நிலையில், இன்று மதியம் முதல் #ValimaiFirstLook என்ற ஹேஷ்டேக் ட்விட்டரில் டிரெண்டாகி வருகிறது. வலிமை படம் குறித்து உண்மையான அப்டேட்டுகளைவிடவும் ஃபேக் அப்டேட்டுகளே அதிகளவில் வந்துள்ளன. வருகிற ஜூலை மாதம், படத்தின் ‘ஃபர்ஸ்ட் லுக்’ போஸ்டர் வெளியாகும் என எதிர்பார்க்கப்படுகிறது. எனினும் இது குறித்த அதிகாரப்பூர்வ தகவல் இன்னும் வெளியாகவில்லை. ஆனால், ஃபர்ஸ்ட் லுக் அப்டேட் வந்துவிட்டதாக ரசிகர்கள் டிரெண்டாக்கி வருகின்றனர்.
முன்னதாக, வலிமை திரைப்படம் தொடர்பாக ஒரு விறுவிறுப்பான தகவல் வெளியானது. அதன்படி இப்படத்தில் நடிகர் அஜித் ஒரு சிபிசிஐடி காவல்துறை அதிகாரியாக நடிக்கிறார் என்ற தகவல் வெளியானது. மேலும் இப்படத்தில் அஜித் ஒரு மிகப்பெரிய சண்டை காட்சியிலும் நடித்துள்ளதாகவும் தகவல் தெரியவந்துள்ளது. ஏற்கெனவே இப்படத்தில் அஜித் ஒரு ஐபிஎஸ் கதாபாத்திரத்தில் நடிக்க உள்ளார் என்ற தகவல் வெளியானது. தற்போது இந்த தகவல் அதை உறுதிப்படுத்தும் விதமாக அமைந்துள்ளது.
இந்தப் படத்தில் உள்ள பாடல்களுக்கு யுவன் சங்கர் ராஜா இசையமைத்துள்ளார். அஜித்-யுவன் சங்கர் ராஜா கூட்டணியில் தீனா தொடங்கி பல வெற்றி படங்கள் அமைந்துள்ளன. எனவே இந்தப் படத்தின் பாடல்களுக்கும் ரசிகர்கள் ஆவலுடன் காத்திருக்கின்றனர். இதுவும் ஹிட் அடிக்கும் என்று அஜித் ரசிகர்கள் நம்பிக்கையுடன் உள்ளனர்.
சமீபத்தில் வேறு ஒரு படத்தின் ட்விட்டர் ஸ்பேசஸ் நிகழ்ச்சியில் பேசிய யுவன் சங்கர் ராஜா, வலிமை திரைப்படத்தில் அம்மா செண்டிமெண்ட் பாடல் இருப்பதாக தகவல் தெரிவித்திருந்தார். இந்த அப்டேட் வந்து ஒரு வாரம் கூட ஆகவில்லை, அதற்குள் அடுத்த அப்டேட் வந்துவிட்டதாக ட்விட்டரில் டிரெண்டாகி வருகின்றது. ஏற்கனவே அப்டேட் கேட்டு, ஆவலாய் எதிர்பார்த்திருக்கும் அஜித் ரசிகர்களுக்கு, இது போன்ற போலிகள் பதிவுகளை போட்டு கடுப்பேற்றி வருவதாக சிலர் பதிவிட்டு வருகின்றனர்.