இயக்குநர் வெற்றிமாறனின் இயக்கத்தில் உருவாகியுள்ள விடுதலை படத்தின் முதல் பாடல் வெளியாகி ரசிகர்களிடத்தில் வரவேற்பை பெற்றுள்ளது.
இயக்குநர் வெற்றிமாறன் அசுரன் படத்திற்குப் பிறகு நடிகர்கள் சூரியை, விஜய் சேதுபதியை வைத்து ‘விடுதலை’ என்ற படத்தை இயக்கியுள்ளார். இந்தப்படத்திற்கு இசையமைப்பாளர் இளையராஜா இசையமைத்துள்ளார். முதல் முறையாக வெற்றிமாறன் - இளையராஜா கூட்டணி இணைந்துள்ளதால் படத்திற்கு எதிர்பார்ப்பு அதிகரித்துள்ளது. வேல்ராஜ் இப்படத்தின் ஒளிப்பதிவாளராக பணியாற்றியுள்ள நிலையில், பிரபல ஒளிப்பதிவாளர் ராஜீவ் மேனன், இயக்குநர் கௌதம் வாசுதேவ் மேனன் ஆகியோர் முக்கிய கேரக்டரில் நடித்துள்ளனர்.
விடுதலை படத்தில் நடிகர் சூரி போலீஸ் வேடத்தில் நடிக்க,விஜய் சேதுபதி போராளியாக நடிக்கிறார். விடுதலை படத்தின் தயாரிப்பில் ஆர்.எஸ்.என்ஃபோடைன்மெண்ட், கிராஸ்ரூட் கம்பெனி ஆகிய நிறுவனங்களுடன் ரெட் ஜெயன்ட் நிறுவனமும் இணைந்துள்ளது. மேலும் படமும் 2 பாகங்களாக வெளிவரும் என அறிவிக்கப்பட்டுள்ளது. இதனால் எப்போது விடுதலை படம் வெளியாகும் என்ற எதிர்பார்ப்பு ரசிகர்களிடத்தில் எழுந்துள்ளது.
முதல் பாகத்திற்கான போஸ்ட் புரொடக்ஷன் பணிகள் விறுவிறுப்பாக நடைபெற்று வரும் நிலையில், விடுதலை படத்தின் முதல் பாகத்தில் இருந்து முதல் பாடல் வெளியாகியுள்ளது. ஏற்கனவே நேற்று முன்தினம் பாடல் மேக்கிங் வீடியோவை இசையமைப்பாளர் இளையராஜா வெளியிட்டிருந்தார்.
இன்று வெளியாகியுள்ள‘ஒன்னோட நடந்தா’ பாடலை சுகா எழுத நடிகர் தனுஷ், பாடகி அனன்யா பட் இருவரும் பாடியுள்ளனர். படத்தில் நடிகர் சூரிக்கான காதல் பாடலாக இது அமைந்துள்ளது. முதல்முறையாக இளையராஜா இசையில் தனுஷ் குரலில் உருவான இப்பாடல் பெரும் வரவேற்பை பெற்றுள்ளது.