சிம்பு நடிப்பில் வெங்கட் பிரபு இயக்கத்தில் கடந்த மாதம் 25 ம் தேதி வெளியான படம் மாநாடு. இந்தப்படத்தில் முக்கிய கதாபாத்திரங்களாக எஸ்.ஜே. சூர்யா, மஹத் உள்ளிட்ட பல நட்சத்திரங்கள் நடித்துள்ளனர். சுரேஷ் காமாட்சி தயாரித்திருக்கும் இப்படம் தீபாவளிக்கு வெளியாகும் என அறிவிக்கப்பட்டு பின்னர் 25ஆம் தேதி ரிலீஸ் ஆகுமென அறிவிக்கப்பட்டது. ஏற்கனவே, படத்தின் பாடல்களும், ட்ரெய்லரும், ஸ்னீக் பீக்கும் ரசிகர்களிடையே வைரலானதை தொடர்ந்து திரைப்படமும் வெளியாகி வசூல்ரீதியாகவும், விமர்சனம் ரீதியாகவும் நல்ல வரவேற்பை பெற்று வருகிறது.
மாநாடு திரைப்படம் மூலம் பலர் 'கம் பேக்' கொடுத்ததாக பலரும் கருத்து தெரிவித்து வந்தனர். அதுதான் உண்மையும்கூட. இந்த படத்தின் மூலம் இசையமைப்பாளர் யுவன் சங்கர் ராஜா, நடிகர் சிம்பு, நடிகர் பிரேம்ஜி , எஸ்.ஜே. சூர்யா மாநாடு திரைப்படத்தின் இயக்குனர் வெங்கட் பிரபு என அனைவருக்கும் திருப்புமுனையாக இருந்தது.
கடைசியாக, கடந்த 2011 ம் ஆண்டு இவரது இயக்கத்தில் பெயர் சொல்லும்படியாக இருந்த திரைப்படம் மங்காத்தா. நடிகர் அஜித் குமாரின் மாஸ் அண்ட் கிளாஸ் நடிப்பில் படம் மெகா ஹிட் அடித்தது. நீண்ட நாட்களுக்கு பிறகு மங்காத்தா திரைப்படம் அஜித்துக்கு வில்லத்தனம் கலந்த ஹீரோயிசம் கதாபாத்திரத்தில் நல்ல பெயரை பெற்று தந்தது. இந்தநிலையில், மங்காத்தா நடிப்பில் அர்ஜுன் கதாபாத்திரத்திற்கு பதிலாக என்னை நடிக்க அழைத்து இருக்கலாம் என்று நடிகர் விஜய் கூறியதாக இயக்குனர் வெங்கட் பிரபு ஒரு தனியார் சேனலுக்கு அளித்த பேட்டியில் கூறியுள்ளார். தற்போது, இந்த வீடியோக்காட்சி இணையத்தில் வைரலாகி வருகிறது.
அந்த பேட்டியில், மங்காத்தா திரைப்படம் பார்த்துவிட்டு நடிகர் விஜய் தன்னை வீட்டுக்கு அழைத்து மிகவும் பாராட்டினார். என்னதான் தொழில்முறை போட்டியாளராக விஜய்க்கு அஜித் இருந்தாலும், அவரது திரைப்படம் நல்ல விமர்சனம் பெறும்போது அழைத்து பாராட்டுவது எல்லாம் பெரிய விஷயம். மங்காத்தா திரைப்படத்தில் ஆக்சன் கிங் அர்ஜுன் நடித்த போலீஸ் கதாபாத்திரத்திற்கு என்னை நடிக்க வைத்து இருக்கலாம் என்றார். அதைத்தொடர்ந்து, எனது தம்பி பிரேம்ஜியிடம் நடிகர் விஜய், ஏன் உங்க அண்ணன் படம்னா மட்டும்தான் நடிப்பியா எல்லாரோட படத்துலயும் நடிக்கணும் என்று அட்வைஸ் செய்ததாக வெங்கட் பிரபு தெரிவித்துள்ளார்.
ABP நாடு செய்திகளை சமூக வலைத்தள பக்கங்களிலும் பின் தொடரலாம்