தமிழ் திரையுலகின் முன்னணி இயக்குனராக வலம் வருபவர் பா.ரஞ்சித். சார்பட்டா படத்தின் வெற்றிக்கு பிறகு மீண்டும் ஆக்ஷன் படத்தில் இறங்குவார் என்று எதிர்பார்த்த நிலையில், பா.ரஞ்சித் அட்டகத்தி பாணியில் அழகிய காதல் கதையை இயக்குவதாக அறிவித்தார். இதன்படி, நட்சத்திரங்கள் நகர்கிறது என்ற காதல் படத்தை தற்போது சத்தமே இல்லாமல் இயக்கி முடித்துள்ளார்.
இந்த நிலையில், இந்த படத்தின் பர்ஸ்ட் லுக் 6-ந் தேதி (நாளை) வெளியாக உள்ளதாக இயக்குனர் பா.ரஞ்சித் அறிவித்துள்ளார். நட்சத்திரம் நகர்கிறது படத்தின் பர்ஸ்ட் லுக் அறிவிப்பால் ரசிகர்கள் உற்சாகம் அடைந்துள்ளனர். மேலும், இதற்காக கருமை, நீலம் கலந்த வண்ணங்களால் ஆன புகைப்படத்தை பகிர்ந்துள்ள பா.ரஞ்சித் “காதல் ஒரு அரசியல்” என்று பதிவிட்டுள்ளார்.
மேலும், பா.ரஞ்சித் தான் பகிர்ந்துள்ள புகைப்படம் உருவான விதத்தையும் வீடியோவாக பகிர்ந்துள்ளார்.
நட்சத்திரம் நகர்கிறது திரைப்படத்தில் காளிதாஸ் ஜெயராம், துஷாரா விஜயன், கலையரசன், ஹரிகிருஷ்ணன், டான்சிங் ரோஸ் ஷபீர் ஆகியோர் நடித்துள்ளனர். கிஷோர்குமார் ஒளிப்பதிவு செய்துள்ளார். இந்த படத்திற்கு டென்மா இசையமைத்துள்ளார்.
இயக்குனர் பா.ரஞ்சித் சார்பட்டா படத்திற்கு முன்பு பழங்குடியின மக்களின் உரிமைகளுக்காக போராடிய பிர்சா முண்டாவின் வாழ்க்கை வரலாற்றையே படமாக்க திட்டமிட்டிருந்தார். ஆனால், சில காரணங்களால் அது தள்ளிப்போனது. சார்பட்டா படத்திற்கு கிடைத்த பிரம்மாண்ட வரவேற்பிற்கு பிறகு மீண்டும் பிர்சா முண்டாவின் வாழ்க்கை வரலாற்றை திரைப்படமாக எடுப்பார் என்று எதிர்பார்த்த நிலையில், ரசிகர்களுக்கு இன்ப அதிர்ச்சியாக காதல் படத்தை எடுத்துள்ளார்.
பா.ரஞ்சித்தின் முதல் படமான அட்டகத்தி திரைப்படம் நகைச்சுவையான காதல் திரைப்படம் ஆகும். மேலும், அட்டகத்தி திரைப்படத்திற்கு பிறகு பா.ரஞ்சித்தின் திரைப்படங்களில் நகைச்சுவை காட்சிகள் ஏதும் பெரியளவில் இடம்பெறவில்லை என்பதும் குறிப்பிடத்தக்கது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்