நடிகர் தனுஷ் இயக்கி நடிக்க உள்ள டி50 படம் குறித்த புதிய அப்டேட் வெளியாகியுள்ளது.
கேப்டன் மில்லர் படத்தில் தற்போது தனுஷ் பிஸியாக நடித்து வருகிறார். இப்படத்தின் படப்பிடிப்பு இறுதிக்கட்டத்தை அடைந்துள்ளது. இந்நிலையில், தனுஷ் அடுத்ததாக நடித்து இயக்கும் டி50 படம் குறித்த அப்டேட்கள் கடந்த சில மாதங்களாக அடுத்தடுத்து பகிரப்பட்டு வருகின்றன.
நட்சத்திரப் பட்டாளம்
அதன்படி, சன் பிச்சர்ஸ் இப்படத்தைத் தயாரிக்க உள்ளதாக அதிகாரப்பூர்வ அறிவிப்பு வெளியானது. மேலும், துஷாரா விஜயன் - காளிதாஸ் ஜோடி ‘நட்சத்திரம் நகர்கிறது’ படத்துக்குப் பிறகு இப்படத்தில் இணைவதாகவும் தகவல்கள் வெளியாகியுள்ளன.
மேலும் நடிகர்கர்கள் எஸ்.ஜே.சூர்யா, சந்தீப் கிஷன், அபர்ணா முரளி உள்ளிட்டோர் இப்படத்தில் நடிப்பதாகவும் தகவல்கள் ஏற்கெனவே வெளியாகின. ஏ.ஆர்.ரஹ்மான் இப்படத்துக்கு இசையமைக்கும் நிலையில், வட சென்னையை மையமாகக் கொண்டு இப்படத்தின் கதைக்களம் இருக்கும் என்றும் தகவல்கள் முன்னதாக வெளியாகின.
சத்தமில்லாமல் பூஜை
இந்நிலையில் இன்று D50 படத்தின் பூஜை சத்தமில்லாமல் முடிந்து, படப்பிடிப்பு தொடங்கியுள்ளதாக இணையத்தில் தகவல்கள் பகிரப்பட்டு வருகின்றன.
கேப்டன் மில்லர் படத்துக்காக நீண்ட தலைமுடியுடன் வலம் வந்த நடிகர் தனுஷ், நேற்று முன் தினம் மொட்டை போட்ட கையுடன் திருப்பதியில் உலவிய புகைப்படங்கள் இணையத்தில் வைரலாகின. இந்நிலையில் , தந்து D50 படத்துக்காக தனுஷ் மொட்டை போட்டுள்ளதாகவும் இன்று அதன்படி பூஜை தொடங்கியுள்ளதாகவும் தகவல்கள் வெளியாகியுள்ளன.
படத்தின் தலைப்பு
மேலும் இப்படத்துக்கு ராயன் எனப் பெயரிடப்பட்டுள்ளதாகவும், வட சென்னையை மையப்படுத்திய ரிவெஞ் கதையாக இப்படம் இருக்கும் என்றும் தகவல்கள் வெளியாகியுள்ளன.
இப்படத்துக்காக 500 வீடுகளைக் கொண்ட பிரம்மாண்ட செட் அமைக்கப்பட்டுள்ளதாகவும், 90 நாள்கள் தொடர்ச்சியாக ஷூட்டிங் நடைபெற உள்ளதாகவும் தகவல்கள் வெளியாகியுள்ளன.
மேலும், நாளை (ஜூன்.06) ஜெயிலர் பாடலான காவாலா பாடல் நாளை வெளியாகும் நிலையில், இந்த அப்டேட்டைத் தொடர்ந்து பூஜை மற்றும் படப்பிடிப்பு தொடங்கியது தொடர்பான அப்டேட்டை படக்குழு வெளியிடும் என்றும் எதிர்பார்க்கப்படுகிறது.
ஏ.ஆர்.ரஹ்மானுடன் கூட்டணி
முன்னதாக இப்படத்தில் நடிகர் விஷ்ணு விஷாலும் நடிப்பதாகத் தகவல் பரவிய நிலையில், இத்தகவலை விஷ்ணு விஷால் மறுத்திருந்தார். இந்நிலையில் இப்படத்தில் மேலும் சில நடிகர்கள் இணையலாம் எனவும் எதிர்பார்க்கப்படுகிறது.
அதேபோல் மற்றொருபுறம் மரியான், கலாட்டா கல்யாணம் (இந்தியில் அத்ரங்கி ரே) திரைப்படத்துக்குப் பிறகு தனுஷ் - ஏ.ஆர்.ரஹ்மான் காம்போவில் இப்படம் வெளியாக உள்ள நிலையில், பாடல்கள் குறித்த எதிர்பார்ப்பும் எகிறியுள்ளது.