நடிகர் தனுஷ் நடிப்பில் வெளியாக உள்ள திருச்சிற்றம்பலம் படத்தின் மூன்றாவது பாடல் வெளியாகியுள்ளது. லைஃப் ஆஃப் பழம் எனப் பெயரிடப்பட்டுள்ள இந்தப் பாடல் முன்னதாக வெளியாகி ரசிகர்களின் கவனத்தை ஈர்த்துள்ளது.
’தி க்ரே மேன்’ படத்தின் மூலம் ஹாலிவுட் வரை கவனம் ஈர்த்துள்ள தனுஷுக்கு, தமிழில் சிறு இடைவெளிக்குப் பிறகு வெளியாகும் படம் ’திருச்சிற்றம்பலம்’. இந்தப் படத்தை குட்டி, யாரடி நீ மோகினி, உத்தம புத்திரன் போன்ற படங்களை இயக்கிய மித்ரன் ஆர்.ஜவஹர் இயக்கியுள்ளார். ‘தங்கமகன்’ படத்துக்குப் பிறகு தனுஷூம் அனிருத்தும் இப்படத்தில் இணைந்து பணியாற்றுகின்றனர்.
முன்னதாக திருச்சிற்றம்பலம் படத்தின் பாடல்களான ’தாய்க் கிழவி’, மேகம் ’கருக்காதோ’ பாடல்கள் வெளியாகி நல்ல வரவேற்பைப் பெற்றன. இந்தப் பாடல்களை நடிகர் தனுஷே எழுதியிருந்தார்.
மேலும், 'ஹலோ மிதி அபி போ’ ‘ஜாலியோ ஜிம்கானா’ உள்ளிட்ட பாடல்களுக்கு கொரியோகிராஃப் செய்த ஜானி மாஸ்டர் மேகம் கருக்காதோ பாடலுக்கு நடன வடிவமைப்பை செய்துள்ள நிலையில், வீடியோவில் இடம்பெற்றிருந்த மேக்கிங் காட்சிகளும் ரசிகர்களின் வரவேற்பைப் பெற்றது.
இந்நிலையில், இப்பாடல்களின் வரிசையில் மூன்றாவது பாடல் வெளியாகி உள்ளது.
நடிகர்கள் பிரகாஷ்ராஜ், நித்யாமேனன், பாரதிராஜா, பிரியா பவானி ஷங்கர் உள்ளிட்ட பலர் இப்படத்தில் முக்கிய கதாபாத்திரங்களில் நடித்துள்ளனர். சன் பிக்சர்ஸ் நிறுவனம் தயாரித்துள்ள இப்படம் வரும் ஆகஸ்ட் 18ஆம் தேதி திரையரங்குகளில் வெளியாக உள்ளது.