கோப்ரா’ படம் வரும் ஆகஸ்ட் 31ஆம் தேதி வெளியாக உள்ள நிலையில், தன் அடுத்த படம் குறித்த சுவாரஸ்யமான அப்டேட்டை நடிகர் விக்ரம் வழங்கியுள்ளார்.
ஒரு பக்கம் கோப்ரா, மற்றொரு பக்கம் ‘பொன்னியின் செல்வன்’ என நடிகர் விக்ரம் படு பிசியாக ப்ரொமோஷன் பணிகளில் ஈடுபட்டு வருகிறார். அந்த வகையில் முன்னதாக ட்விட்டர் ஸ்பேஸ் தளத்தில் கோப்ரா படம் குறித்து நடைபெற்ற விவாதத்தில் விக்ரமும், படக்குழுவினரும் கலந்துகொண்டு பேசினர்.
அப்போது கோப்ரா படத்தை இயக்கியுள்ள அஜய் ஞானமுத்து இயக்கத்தில் தன் அடுத்த படமான சியான் 62 படத்திலும் நடிக்க உள்ளதாக அப்டேட் வழங்கி தன் ரசிகர்களை குதூகலப்படுத்தியுள்ளார்.
இயக்குநர் அஜய் ஞானமுத்து முன்னதாக டிமாண்டி காலனி, இமைக்கா நொடிகள் ஆகிய படங்களை இயக்கியுள்ளது குறிப்பிடத்தக்கது.
மேலும் கோப்ரா படம் எமோஷனல் ட்ராமாவாக இருக்கும் எனத் தெரிவித்துள்ள விக்ரம், தன் இரண்டு படங்கள் 3 ஆண்டுகளுக்குப் பிறகு அடுத்தடுத்து வருவதாக மகிழ்ச்சி தெரிவித்துள்ளார்.
கோப்ரா படத்தில், இந்திய கிரிக்கெட் அணியின் முன்னாள் வேகப்பந்துவீச்சாளர் இர்பான் பதான், கே.ஜி.எப். நாயகி ஸ்ரீநிதி ஷெட்டி, மிருணாளினி ரவி, மியா ஜார்ஜ், கனிகா, கே.எஸ்.ரவிக்குமார் எனப் பலர் நடித்துள்ளனர். அஜய் ஞானமுத்து இயக்கியுள்ள் இப்படத்துக்கு ஏ.ஆர்.ரஹ்மான் இசையமைத்துள்ளார்.
இப்படத்தை செவன்த் ஸ்கிரீன் ஸ்டூடியோஸ் நிறுவனம் தயாரித்துள்ளது. உதயநிதி ஸ்டாலினின் ரெட்ஜெயண்ட் மூவிஸ் நிறுவனம் இப்படத்தின் திரையரங்க வெளியீட்டு உரிமையை கைப்பற்றியுள்ளது.
முன்னதாக இப்படத்தின் இசை வெளியீட்டு விழா சென்னை ஃபீனிக்ஸ் மாலில் கோலாகலமான முறையில் நடைபெற்று முடிந்தது குறிப்பிடத்தக்கது.