பிரபல நடிகர் ரஜினி, மறைந்த நடிகை ஸ்ரீதேவியை திருமணம் செய்ய நினைத்ததாக , பிரபல நடிகரும், பத்திரிக்கையாளருமான சித்ரா லட்சுமணன் நேர்காணலில் தெரிவித்த வீடியோ சமூக வலைத்தளங்களில் வைரலாகி வருகிறது.
தமிழ் சினிமாவில் ஹீரோக்கள் ஆதிக்கம் செலுத்திய காலக்கட்டத்தில் சில ஹீரோயின்களும் தங்கள் ஆளுமையை நிரூபித்தார்கள். அதில் மிக முக்கியமானவர் ஸ்ரீதேவி. குழந்தை நட்சத்திரமாக அறிமுகமாகி, ஹீரோயினாக அடியெடுத்து வைத்து கோலிவுட் முதல் பாலிவுட் வரை இளைஞர்களின் கனவுக்கன்னியாக திகழ்ந்தவர். போனி கபூரை திருமணம் செய்த அவருக்கு ஜான்வி கபூர், குஷி கபூர் ஆகிய இரு மகள்கள் உள்ளனர். இருவரும் சினிமாவில் நடித்து வருகின்றனர். போனி கபூரும் தற்போது படத் தயாரிப்பில் ஈடுபட்டு வருகிறார்.
ஆனால் ஸ்ரீதேவி கடந்த 2018 ஆம் ஆண்டு பிப்ரவரி 24 ஆம் தேதி துபாயில் நடந்த நிகழ்ச்சியில் பங்கேற்ற போது மாரடைப்பு காரணமாக உயிரிழந்து விட்டார். அவரது மரணம் இன்றளவும் பலராலும் நம்ப முடியாத ஒன்றாகவே உள்ளது. இப்படியான நிலையில் நடிகர் ரஜினி - நடிகை ஸ்ரீதேவி தொடர்பாக ஒரு வீடியோ ஒன்று சமூக வலைத்தளங்களில் வைரலாகி வருகிறது. அதில் சில தகவல்களை நடிகரும், பத்திரிக்கையாளருமான சித்ரா லட்சுமணன் தெரிவித்துள்ளார்.
அதாவது, “ஸ்ரீதேவி ரஜினியை காதலித்தாரா என்பதில் உறுதியான தகவல் இல்லை. ஆனால் ரஜினி ஸ்ரீதேவியை காதலித்தார் என்பது நிஜம். இதைப்பற்றி இயக்குநர் மகேந்திரன் ஒரு பேட்டியில் குறிப்பிட்டுள்ளார். ஸ்ரீதேவியை திருமணம் செய்ய நினைத்து பெண் கேட்க, அவரின் வீட்டு கிரஹப்பிரவேசத்துக்கு நானும், ரஜினியும் சென்றிருந்தோம். ஸ்ரீதேவியின் தாயாரிடம் ரஜினி அன்றைக்கு தான் அதைப் பற்றி பேசுவதாக இருந்தது.
நாங்கள் அந்த வீட்டுக்குள் அடியெடுத்து வைத்ததும் மின்சாரம் துண்டிக்கப்பட்டு வீடு முழுவதும் இருள் சூழ்ந்தது. அந்த செண்டிமெண்ட் காரணமாக அன்றைக்கு ஸ்ரீதேவியை திருமணம் செய்துக் கொள்வது பற்றி பேசாமலேயே ரஜினிகாந்த் திரும்பி வந்து விட்டார். அன்றைக்கு அந்த மின்சாரம் தடை ஏற்படாமல் இருந்திருந்தால் ஸ்ரீதேவியை திருமணம் செய்வது பற்றி அவரது தாயாரிடம் ரஜினி பேசியிருப்பார் என மகேந்திரன் தெரிவித்திருப்பார்’ என சித்ரா லட்சுமணன் கூறியுள்ளார். இந்த வீடியோ பெரும் பேசுபொருளாக மாறியுள்ளது.
ரஜினியும், ஸ்ரீதேவியும் இணைந்து மூன்று முடிச்சு,காயத்ரி, கவிக்குயில், பிரியா, 16 வயதினிலே, போக்கிரி ராஜா வணக்கத்துக்குரிய காதலியே, தர்ம யுத்தம், ஜானி, ராணுவ வீரன், தனிக்காட்டு ராஜா, அடுத்த வாரிசு, நான் அடிமை இல்லை உள்ளிட்ட பல படங்களில் ஜோடியாக நடித்துள்ளனர் என்பது குறிப்பிடத்தக்கது.